Taita Diosmi punta jarida y punta huarmidaga rrurrarca

Edén ladobimi Jehová Diosga shuj juila sisa pambada rrurrarca. Chai pambabiga ashca sisaguna, yuraguna y animalgunami tiyarca. Jipa, Taita Dios punta jari Adandaga allpamundami rrurrarca, shinalladi paibu singabimi causaida cuj samida fucurca. Chai jipaga, ¿imadi pasarca? Taita Dios rrurrashca jarimi causai callarirca. Jehová Dios Adandaga jardín pambada cuidallun y tucui animalgunada nombreda churallunmi mandarca.

Jehová Dios Adandaga cashnami mandarca: “Tucui laya yuragunamundami micui pudingui, pero shuj yuramundallami na micuna gangui, chai yuramunda micushaga huañunguimi”.

Asha tiempo jipami Jehová Diosga nirca: “Adanmun shuj ayudanteda rrurrasha”, Adanda huañujta puñuchishmi shuj costilla tulluda llujchish paibu huarmida rrurrarca. Chai huarmibu shutiga Evami garca. Chashnami Adán y Evaga punta familia tucurca. Adán paibu huarmida rricushaga, ¿imashinashi sintirishca ganga? Demas contento gashcamundami cashna nirca: “Jehová Diosmi ñuca costillamunda cai huarmida rrurrashca. Paiga ñuca layami gan”.

Jehová Dios Adán y Evadaga ashca huahuagunada charish cai allpada jundachinguichi nircami. Ishquindipura contentos trabajashmi cai allpada shuj paraíso rrurrallun munarca. Tucui allpa pachami jardín de Edén shina shuj juila sisa pamba tucuna garca. Pero chaiga na fajtarircallu. ¿Imamunda? Respuestadaga catij leccionbimi yachashun.