Shuj huahuadami chari pudinajurca

Abrahán y Saraga ashca huatagunadami cazarashcaguna garca. Ur ciudadbi paiguna causajushca huasida saquishmi, carpa huasigunabi causangabu llujshinajurca. Pero Saraga Jehová Diosbi confiashcamundami, nimamunda na quejarij garca.

Sara shuj huahuada charinada munashcamundami Abrahanmun cashna nirca: “Ñucada sirvij Agar canhun shuj huahuada charijpi, chai huahuadaga ñuca propio huahuada shinami juyasha”. Chaimi tiempo pasashca jipa, Agar huarmiga shuj huahuada charirca. Chai huahuabu shutiga Ismaelmi garca.

Ashca tiempo jipa Abrahán 99 huatada y Sara 89 huatagunada charijpimi, quimsa jariguna paigunada visitangabu chayanajurca. Abrahán chai jarigunadaga shuj yura ucubi samallun y paigunaun micullunmi invitarca. Chai jarigunaga, ¿pigunadi garca? Angelgunami garca. Paiguna Abrahandaga cashnami nirca: “Shamuj huatami canbu huarmiunga shuj huahuada charinguichi”. Pero Saraga carpa ucumunda chaida uyash, uculla asishmi cashna yuyarca: “¿Cai edadbillu shuj huahuadaga chari pudina gashcani?”.

Jehová Diosbu ángel nishca shinalladimi, catij huata Saraga shuj jari huahuada charirca. Chai huahuadaga Isaac shutidami churanajurca, Isaac shutiga “asina” nisha ninmi.

Isaac cinco huatagunada charijpi, Ismael paimunda burlarijujtami Saraga rricurca. Saraga paibu churida cuidasha nishcamundami Abrahanhun parrlash cashna nirca: “Caimunda Ismael y Agarda llujchish cachai”. Abrahán paibu churida llujchish cachanadaga na munarcallu. Pero Jehová Dios Isaacda cuidanada munashcamundami Abrahanda cashna nirca: “Sara nishcada rrurrai. Ismaeldaga ñucami cuidasha. Pero ñuca rrurrashca promesagunaga Isaacmundami fajtaringa”.