LECCIÓN 8
Abrahán y Sarami Taita Diosda cazunajurca
Babel mayallabimi Ur nishca ciudad tiyarca. Chaibi causaj gentegunaga Jehová Diosda adoranabu rrandiga, yanga santogunadami adorajguna garca. Pero chai Ur ciudadbiga Abrahanmi Jehová Diosda adoraj garca.
Jehová Dios Abrahandaga cashnami nirca: “Canbu huasida y familiagunada saquishmi ñuca cachashca ladomun causangabuga rrina gangui”. Y jipa Taita Diosga caidami promitirca: “Canbu familiamundami ashca genteguna miraringa. Y canmundami shamuj funchabiga cai allpabi causaj tucui genteguna beneficiaringa”.
Abrahanga maibi causagrina gashcada na yachashash Jehová Diosbimi confiarca. Chashnami, Abrahán paibu huarmi Sara, paibu taita Taré y paibu sobrino Lotga Taita Diosda cazush, paiguna charishca cosasgunada apash cutishuj ladobi causangabu rrinajurca.
Abrahanga 75 huatagunada charishmi, paibu familiaun Jehová Dios cusha nishca allpamunga chayanajurca. Pai causangabu chayashca ladoga Canaán shutimi garca. Chaibimi Jehová Diosga cai promesada rrurrarca: “Rricui tucui cai allpadami canbu huahuagunamun cusha”. Pero Abrahán y Saraga ña mayorguna gashcamundami huahuagunadaga na charinajurca. Entonces Jehová Dios rrurrashca promesaga, ¿imashinadi fajtari pudina garca?
“Abrahanga feda charishcamundami [...] Taita Dios cusha nishca allpada chasquingabu rrirca. Maimun rrina gashcada na yachashash, pai causashca ladomundami llujshish rrirca” (Hebreos 11:8).