LECCIÓN 11
Abrahanga Taita Diosbi crishcadami rricuchirca
Abrahán paibu churi Isaacmunga, Jehová Dios rrurrashca promesagunabi confiallun y paida juyallunmi yachachirca. Pero Isaac 25 huatagunada charijpimi Taita Dios Abrahandaga cashna nirca: “Canbu shujlla churida Moria lado urcumun apashmi paidaga ñucamun shuj ofrenda shinada cuna gangui”. Cashna Taita Dios mañashcada fajtachina, Abrahanbuga shinchimi gashca ganga.
Pero Jehová Dios imamunda chaida rrurrallun mañashcada na yachashash, Abrahanga cazurcami.
Chai caya funcha Abrahanga madrugado jatarish, paibu churi Isaacda y paida sirvij ishqui jarigunada apashmi Moria lado urcumun rrirca. Quimsa funchaguna jipa Moria lado urcubi chayanajushmi, Abrahán paida sirvij jarigunadaga cashna nirca: Ñuca churiun ofrendada cush vueltamunagama caibi shuyaichi. Abrahanga cuchilloda aisash y paibu churimun yantada apachishmi urcumunga llujshinajurca. Pero Isaac paibu taitadaga cashnami tapurca: “Ofrenda shina, cuna animalga, ¿maibidi gan?”. Abrahanga contestarca: “Ñuca huahualla, Jehová Diosmi cunga”.
Y ña urcumun chayanajushaga, ofrendada rrupachingabumi shuj altar nishcada rrurranajurca. Y chai jipa Abrahanga, Isaacbu chaqui y maquigunada huatashmi altar jahuabi sirichirca.
Abrahán cuchilloda japish, Isaacda huañuchi callarijpimi jahua cielomunda Jehová Diosbu ángel cashna nirca: “Abrahán, paidaga imadash ama rrurraillu. Canbu churida shuj ofrenda shina cunadaga na manchashcanguillu. Chashnami Taita Diosbi feda charishcadaga rricuchishcangui”. Chai jipa Abrahanga, shuj carnero llama yura siquibi paibu cachugunaun tsagnarishca shayajujtami rricurca. Chaimi Isaacbu chaqui y maquigunada rrato pascash, chai carnero llamada huañuchish Taita Diosmun shuj ofrenda shinada rrupachish curca.
Chai funchamundami Jehová Diosga Abrahanmi ñuca amigo gan nirca. ¿Imamundadi chashna nirca? Porque Abrahanga Jehová Dios mandashcada na intindishash tucuidami cazurca.
Jehová Diosga Abrahanmun rrurrashca promesadaga cutindimi yuyachirca: “Genteguna mirarillunga ashca huahuagunada cushmi candaga bendiciasha”. Jehová Dios cai shimigunada nishaga Abrahanbu familiamunda, paida sirvij gentegunada bendiciana gashcadami nisha nirca.
“Taita Diosga cai mundobi causaj gentegunada ashcada juyashcamundami paibu shujlla churida cai allpamun cacharca, majinbish paibi feda charijga ama huañullun, sino para siempre causai pudillun” (Juan 3:16).