1 Reyes
3 Salomonca Egipto llajtata mandaj rey faraonpaj ushushihuan cazarashpami faraonpaj familia tucurca. Salomonca faraonpaj ushushitaca paipaj propio huasita, Jehová Diospaj huasita, Jerusalén muyundij pircacunata tucuchingacamami Davidpaj Llajtaman pusharca. 2 Chai punllacunapica Jehová Diospaj shutita jatunyachina huasitaca manaraj rurashcacunachu carca. Chaimantami gentecunaca adorana lugarcunapi* sacrificiocunata rurashpa catircacuna. 3 Salomonca paipaj yaya David cushca leyta cazushpami Jehová Diosta cꞌuyashcata ricuchirca. Shinapish adorana lugarcunapimi sacrificiocunata ruraj carca, ofrendacunatapish cushnichij carca.
4 Reyca Gabaonmanmi rirca. Chai adorana lugar ashtahuan importante* cashcamantami chaipi sacrificiocunata cungapaj rirca. Salomonca 1.000 animalcunatami sacrificiota shina altar jahuapi rupachishpa curca. 5 Salomón Gabaonpi cajpimi Jehová Diosca muscuipi tuta ricurishpaca: “Can ima munashcata mañailla” nirca. 6 Salomonca cashnami cutichirca: “Canta sirvij ñuca yaya Davidmanca achcata cꞌuyashcatami* ricuchishcangui. Paica tucuipi cazushpa, cashcata rurashpa, chuya shunguhuanmi cantaca sirvirca.* Paipaj jatun tiyarinapi paipaj churi tiyarichun saquishpami cunan punllacama paitaca achcata cꞌuyashcata ricuchishpa catishcangui. 7 Cunanca ñuca Jehová Dioslla, experienciata mana charij joven* cajpipish ñuca yaya Davidpaj randimi canta sirvij ñucataca rey cachun churashcangui. 8 Canta sirvijca can agllashca gentecunapurapimi. Paicunaca mana yupaipaj, yallitaj achcacunami. 9 Canta sirvij ñucamanca cambaj llajta gentecunata juzgangapaj, ima alli cashcata ima mana alli cashcata yachangapajpish shuj cazuj shunguta cuhuai. Cambaj llajta gentecunaca yallitaj achcacunami,* ¿pitaj paicunataca juzgai tucungari?” nircami.
10 Salomón chashna mañashcataca Jehová Diosca achcatami munarca. 11 Chaimantami Diosca cashna nirca: “Canca achca huatacunata* causanata, achca charinacunata, canta pꞌiñajcuna huañuchunpish mana mañashcanguichu. Ashtahuanpish cashcata rurashpa juzgangapajmi alli yachaita mañashcangui. Chaicunata mañashcamantaca 12 can nishcatami rurasha. Canmanca alli yachaj, intindij shungutami cusha. Can laya runaca nunca mana tiyashcachu, cutinpish mana tiyangachu. 13 Shinallataj can mana mañashcatami cusha: achca charinacunatami cusha. Cantaca jatunyachishami. Can causashcacamaca* can laya reyca pi mana tiyangachu. 14 Cambaj yaya David rurashca shinallataj canpish ñuca leycunata, ñuca mandamientocunata cazushpa ñuca ñancunapi purijpica achca huatacunata causachunmi saquisha”* nircami.
15 Salomón rijcharishpaca shuj muscui cashcatami cuentata curca. Chaimantami Jerusalenman rishpa Jehová Dioshuan ari ninacushca arca ñaupajpi rupachishca sacrificiocunata, Dioshuan alli tucungapaj ofrendacunata curca. Shinallataj tucui paita sirvijcunapajmi shuj jatun micuita rurarca.
16 Chai punllacunapica huainayashpa causaj ishqui huarmicunami reypaj ñaupajman rircacuna. 17 Punta huarmica cashnami nirca: “Ñuca amitolla, quishpichihuai. Cai huarmipish, ñucapish chai huasillapitajmi causanchij. Pai huasipi cajpimi ñucaca shuj huahuata huacharcani. 18 Ñuca huachashca quimsa punllacuna qꞌuipami paipish shuj huahuata huacharca. Huasipica ishquindijllami carcanchij. Ñucanchijhuanca pi mana carcachu. 19 Tutaca cai huarmipaj huahuaca paillataj llapishcamantami huañushca carca. 20 Chaimantami chaupi tuta jatarishpa canta sirvij ñuca dormicujpica ñuca ladomanta huahuata apashpa paipaj rigrapi* sirichishca carca. Cutin paipaj huañushca huahuataca ñuca rigrapimi sirichishca carca. 21 Tutamanta ladoca ñuca huahuata chuchuchingapajmi jatarircani. Chaimi huahua huañushcata ricurcani. Pero alli alli ricushpaca mana ñuca huachashca huahua cashcatami cuentata curcani” nircami. 22 Shinapish caishuj huarmica: “¡Mana, causaj huahuaca ñucapajmi, cambaj huahuaca huañurcami!” nircami. Cutin punta huarmica: “Mana, cambaj huahuami huañurca, ñuca huahuaca causacunmi” nircami. Chashnami reypaj ñaupajpi ishquindij pꞌiñanacucurca.*
23 Chaimi reyca: “Cai huarmica ‘¡Causaj huahuaca ñucapajmi, cambaj huahuaca huañurcami!’ ninmi. Cutin caishuj huarmica ‘¡Mana, cambaj huahuami huañurca, ñuca huahuaca causacunmi!’ ninmi” nirca. 24 Chashna nishpami reyca: “Shuj espadata apamuichij” nishpa mandarca. Shina mandajpimi shuj espadata apamurcacuna. 25 Reyca: “Causaj huahuataca ishquipi chaupichij. Chaupitaca shuj huarmiman, chaupitaca caishuj huarmiman cuichij” nishpami mandarca. 26 Chai ratomi causaj huahuapaj mamaca shungu sintijpi reytaca: “¡Ñuca amitolla! ¡Causaj huahuataca paiman cuchun saquipailla! ¡Ama huañuchihuaichu!” nishpa rogarirca. Pero caishuj huarmica: “¡Ñucapajpish, cambajpish ama cachun! ¡Huahuataca ishquipi chaupichijlla!” nircami. 27 Chaita uyashpami reyca: “¡Causaj huahuataca punta huarmiman cuichij! Ama huañuchichijchu, paimi huahuapaj mamaca” nirca.
28 Rey chashna juzgashcata yachaj chayashpami tucui israelitacunaca achcata mancharircacuna. Paicunaca cashcata rurashpa juzgachun reyman Dios alli yachaita cushcatami ricurcacuna.