1 Reyes
4 Rey Salomonca tucui Israel llajtatami mandacurca. 2 Paita ayudaj autoridadcunaca caicunami carca. Sadocpaj churi Azariasca sacerdotemi carca. 3 Sisapaj churicunaca Elihorefpish, Ahiyapish secretariocunami carca. Ahiludpaj churi Jehosafatca registradormi carca. 4 Jehoiadapaj churi Benayaca soldadocunata mandajmi carca. Sadocpish, Abiatarpish sacerdotecunami carca. 5 Natanpaj churi Azariasca mayordomocunata mandajmi carca. Natanpaj churi Zabudca sacerdotemi carca. Paica reypaj amigomi carca. 6 Ahisarca palaciopi mayordomomi carca. Cutin Abdapaj churi Adoniramca sinchi trabajocunata rurachun tandachishca runacunata mandajmi carca.
7 Salomonca tucui Israel llajtapica 12 mayordomocunatami charirca. Paicunami reymanpish, reypaj palaciopi causajcunamanpish micunata cujcuna carca. Cada unomi huatapica shuj quillata micunata cuna carca. 8 Mayordomocunaca caicunami carca. Efraín urcucunapica Hurpaj churimi mandacurca. 9 Macazpi, Saalbimpi, Bet-Semespi, Elón-Bet-Hananpica Dequerpaj churimi mandacurca. 10 Arubotpica Hesedpaj churimi mandacurca (paica Socó llajtata, Héfer tucui allpacunatami mandacurca). 11 Dor tucui urcucunapica Abinadabpaj churimi mandacurca (paica Salomonpaj ushushi Tafathuanmi cazararca). 12 Ahiludpaj churi Baanaca Taanacta, Meguidota, Zaretán ladopi saquirij tucui Bet-Seantami mandacurca. Bet-Seanca Jezreelmanta ashtahuan uramanmi saquirin. Bet-Seanmanta callarishpaca Abel-Meholacama, Jocmeam llajtacunacamami mandacurca. 13 Gueberpaj churica Ramot-Galaadpimi mandacurca (paica Galaadpi saquirij Manasespaj churi Jairpaj uchilla pueblocunata, Basanpi saquirij Argob ladocunatami mandacurca. Pircacunayuj, cobre barracunayuj* 60 jatun llajtacunatami mandacurca). 14 Idopaj churi Ahinadabca Mahanaimpimi mandacurca. 15 Ahimaazca Neftalipaj familiacunapaj llajtatami mandacurca (paica Salomonpaj caishuj ushushi Basemathuanmi cazararca). 16 Husaipaj churi Baanaca Aserpaj familiacunapaj llajtata, Bealot llajtatapishmi mandacurca. 17 Paruahpaj churi Jehosafatca Isacarpaj familiacunapaj llajtatami mandacurca. 18 Elapaj churi Simeica Benjaminpaj familiacunapaj llajtatami mandacurca. 19 Uripaj churi Gueberca Galaad allpacunatami mandacurca (ñaupaca cai allpacunataca amorreocunata mandaj rey Sehón, Basanta mandaj rey Og nishcami mandajcuna carca). Shinallataj shuj mayordomomi tucui caishuj mayordomocunataca mandacurca.
20 Judamanta,* Israelmanta gentecunaca mama cucha uripi tiyaj arena shinami achcacuna carca. Paicunaca micushpa, ubyashpami causarcacuna. Cushillami carcacuna.
21 Salomonca Éufrates jatun yacumanta callarishpaca filisteocunapaj allpacunacama, Egipto llajta lindecunacamami tucui llajtacunata mandacurca. Chai llajtacunapi causaj gentecunami impuestocunata pagajcuna carca.* Rey causashcacamaca tucui punllacunami paita sirvircacuna.
22 Salomonca punllantami cai tucui micunata chasquij carca: 30 coro* alli harinata, 60 coro shujtaj harinata, 23 huirayashca 10 huagracunata, michicushca 20 huagracunata, 100 ovejacunata, tauca tarugacunata,* gacelacunata, corzo nishca animalcunata, huirayashca cuclillo nishca pajarocunatapishmi chasquij carca. 24 Salomonca Éufrates jatun yacu cai ladoman caj tucui llajtacunatami mandarca. Tifsamanta callarishpaca Gazacama, Éufrates jatun yacu cai ladoman caj tucui reycunatapishmi mandarca. Paica muyundij llajtapi causaj gentecunahuanpish tranquilomi causarca. 25 Salomón mandacui tucui huatacunapica Judamanta gentecunapish, Israelmanta gentecunapish Danmanta callarishpaca Beer-Sebacamami mana manchashpa causarcacuna. Cada unomi paicunapaj propio uva yuracunata, propio higo yuracunata charirca.
26 Salomonca paipaj carretacunata aisaj caballocunapajmi 4.000* corralcunata charirca. Shinallataj 12.000 caballocunatapishmi* charirca.
27 Mayordomocunaca rey Salomonmanpish, paipaj mesapi micujcunamanpishmi tucuicunaman micunata cujcuna carca. Cada unomi paicunapaj tocashca quillapi micunata cungapaj responsable carca. Ima ama illachunpishmi ricujcuna carca. 28 Cada unomi paicunata mañashca shina cebadatapish, ujshatapish carangapaj caballocuna maipi cashcaman, carretata aisaj caballocuna maipi cashcaman apajcuna carca.
29 Diosca Salomonmanca achca alli yachaita, achca alli yuyaitami curca. Shinallataj mama cucha uripi tiyaj arena shina achca cosascunata intindichunmi alli intindij shunguta curca. 30 Salomonca inti llujshin ladomanta alli yachaj runacunatapish yalli, Egipto llajtamanta alli yachaj runacunatapish yalli ashtahuan alli yachajmi carca. 31 Tucui shujtaj runacunatapish yalli alli yachajmi carca. Paica Zerahpaj familiamanta caj Etantapish yalli, Hemán, Calcol, Dardá runacunatapish yalli, Maholpaj churicunatapish yalli alli yachajmi carca. Paica tucui cꞌuchulla llajtacunapimi ashtahuan rijsishca carca. 32 Salomonca 3.000 proverbiocunata, 1.005 cantocunatami quillcarca.* 33 Paica yuracunamantami parlarca. Líbano urcucunapi tiyaj cedro yuracunamanta callarishpaca patapi huiñaj hisopo plantacunacamami parlarca. Shinallataj animalcunamanta, pajarocunamanta, llucashpa purij animalcunamanta, pescadocunamantami parlarca. 34 Tucui llajtacunamanta gentecunami Salomón alli yachaita charishcata uyanaman shamurcacuna. Salomón alli yachaita charishcata uyashpaca tucui llajtacunata mandaj reycunapishmi uyanaman shamurcacuna.