¿Imamantataj Bibliata yachashpa catina cangui?

1. Bibliata yachashpa catinaca ¿ima shinataj ayudanga?

Bibliapaj huaquin yachachishcacunata ricunaca, Jehová Diosta cꞌuyachunmi ayudashca. Chai cꞌuyaitaca ashtahuanmi mirachina cangui (1 Pedro 2:2). Bibliamanta yachashpaca Jehová Diospajman ashtahuanmi cꞌuchuyangui, huiñai causaitapish chasquinguimi. Juan 17:3; Judas 21-ta rezapai.

Diosmanta ashtahuan yachashpaca, cambaj crishcacunata sinchiyachinguimi. Diostapish ashtahuanmi cushichingui (Hebreos 11:​1, 6). Biblia yachachishcacunata alli crinaca ñucanchij juchacunamanta llaquirishpa, ñucanchij causaipi allita rurachunmi ayudan. Hechos 3:19-ta rezapai.

2. ¿Ima shinataj shujtajcunata ayudai tucungui?

Tucuicunami alli huillaicunata parlanata munanchij. Bibliapi yachashcata ¿manachu shujtajcunaman parlasha ningui? Ñaupajman catishpaca Jehová Diosmanta, gentecunapaj alli huillaicunata Dios charishcatapish Bibliahuanmi alli yachachi tucungui. Mateo 28: 19, 20-ta rezapai.

Familiacunaman amigocunamanmi parlashpa callari tucungui. Shinapish cꞌuyaihuan mana pꞌiñarishpami parlana cangui. Cambaj crishcacunaca mana allichu can ninapaj randica, Dios imata ruragrishcatami parlana cangui. Cushilla, mana pꞌiñarishpa parlanami gentecuna alli uyachun ayudanga. 2 Timoteo 2:​24, 25-ta rezapai.

3. ¿Bibliata yachashpaca ima shinataj Diospaj ñaupajpica ricuringui?

Bibliata yachashpami Diospajman ashtahuan cꞌuchuyangui, paipaj alli amigomi tucungui. Diospaj ñaupajpica paipaj familia shinami ricuringui. 2 Corintios 6:​18-ta rezapai.

4. Ashtahuan yachashpa catingapajca ¿imataj ayudanga?

Bibliamanta yachashpa catinataca mana saquinachu cangui (Hebreos 5:​13, 14). Shuj testigo de Jehovatami Bibliamanta yachashunchij librohuan Bibliamanta yachachichun mañana cangui. Bibliamanta ashtahuan yachashpaca, cushillami causangui. Salmo 1:​1-3; 73:​27, 28-ta rezapai.

Bibliapi tiyaj alli huillaicunaca “cushi Dios” Jehovamantami shamun (1 Timoteo 1:​11, NM) Diosta alli servijcunahuan tandanacunaca, Diospaj amigo tucuchunmi canta ayudanga (Hebreos 10:​24, 25). Jehová Diospaj munaita tucui shunguhuan rurashpaca, huiñaita causana bendiciontami chasquingui. Diospajman cꞌuchuyanaca tucuimanta yalli allimi can. 1 Timoteo 6:​19-ta rezapai.