Jacobmi herenciataca japirca

Isaacca 40 huatacunata charishpami Rebecahuan cazararca. Paitaca achcatami cꞌuyarca. Qꞌuipaca gemelo churicunatami charircacuna.

Esaumi puntapi huacharirca. Qꞌuipaca Jacobmi huacharirca. Tiempohuanca Esauca animalcunata japinata alli yachajmi tucurca. Paica campopi canatami munarca. Cutin Jacobca huasipi canatami munarca.

Chai tiempopica yaya huañujpica punta churimi cullquitapish, allpacunatapish qꞌuipa huahuacunata yalli japina carca. Chaitami herencia nijcuna carca. Isaacpaj familiapica Jehová Dios Abrahanman cusha nishcacunapishmi shuj herencia shina carca. Esauca chai herenciataca mana valichircachu. Pero Jacobpajca achca valishcami carca.

Esauca tucui punlla animalcunata japishpa pasashca qꞌuipami shaicushca tigrarca. Huasiman chayajpimi Jacob yanucushca micunaca mishquiman ashnacurca. Chaimi Esauca Jacobtaca: ‘¡Yaricaihuan huañucunimari. Can charicushca pucajlla lenteja sopamanta ashata cuhuai!’ nirca. Chaimi Jacobca: ‘Primeroca can punta churi cana derechota ñucaman cꞌatui’ nirca. Shina nijpimi Esauca: ‘¿Chai herenciaca imapajtaj sirvinyari? Chaihuan saquirilla’ nirca. Chaita rurashpaca, ¿Esauca yachaj cashcatachu ricuchirca? Mana. Shuj plato micunallamantami pai japina herenciata yangapi churarca.

Isaac yuyaj cajpimi Esauman bendicionta cuna punlla chayamurca. Shinapish Esauta bendicianapaj randica Jacobta bendiciachunmi Rebecaca ayudarca. Esaú chaita yachaj chayashpaca achcata pꞌiñarishpami Jacobta huañuchinata yuyacurca. Isaacpish, Rebecapish Jacobta cuidashun nishpami: ‘Cambaj mamapaj turi Labanpajman ri. Esaú canta pꞌiñacushcata cungaringacama paihuan causagri’ nircacuna. Paicunata cazushpami Jacobca paipaj huauqui ama huañuchichun miticushpa rirca.