Jacobpish, Esaupish alli tucurcacunami

Jehová Diosca Abrahantapish, Isaactapish cuidashca shinallatajmi Jacobtapish cuidasha nirca. Jacobca Harán llajtapimi causai callarirca. Chaipimi cazararca, achca huahuacunata charirca, charij runapishmi tucurca.

Shuj punllami Jehová Diosca Jacobtaca: ‘Cambaj yayacunapaj allpaman tigrailla’ nirca. Chaimi paipaj familiahuan tigranata decidircacuna. Ña viajacujpica Jacobta sirvijcunaca: ‘Cambaj huauqui Esauca 400 runacunahuanmi tupanaman shamucun’ nircacunami. Jacobca paita, paipaj familiatapish Esaú llaquichinatami mancharca. Chaimi Yaya Diostaca: ‘Ñuca huauquipaj maquimanta quishpichichunmi rogapani’ nishpa mañarca. Cayandij punllaca Jacobca ovejacunata, chivocunata, vacacunata, camellocunata, burrocunatami Esauman cuchun cacharca.

Chai tutaca Jacobca pailla cashpami shuj angelta ricurca. Chai angelca paihuanmi macanacui callarirca. Cayandij punllacama macanacushcamantami Jacobca chugririshca saquirirca. Shinapish macanacunataca mana saquircachu. Chai ángel cachari nijpipish Jacobca: “Ñucata bendiciangacama mana cacharishachu” nircami.

Chaimi angelca Jacobta bendiciarca. Chaimantami Jacobca Esaú paita llaquichichun Dios mana saquina cashcata yacharca.

Chai tutamantaca Esaú 400 runacunahuan shamucujtami Jacobca carumanta ricurca. Paica paipaj familiata ñaupashpa rishpami Esaupaj ñaupajpi siete cutin cumurirca. Esauca callpashpa rishpami Jacobta ugllarishpa, ishqui tucushpa huacarcacuna. Chashnami alli tucurcacuna. Chaita ricushpami Diosca cushicushcanga.

Qꞌuipaca Esauca paipaj huasimanmi tigrarca. Cutin Jacobca pai risha nishca llajtamanmi rirca. Jacobpaj 12 churicunaca: Rubén, Simeón, Leví, Judá, Dan, Neftalí, Gad, Aser, Isacar, Zabulón, José, Benjaminmi carca. Tiempohuanca Diosca Josemantami paipaj llajtata quishpichirca. ¿Ima shina chaita rurashcata yachasha ninguichu? Ricushun.