Puca cuchapimi shuj milagro tiyarca

Faraonca israelitacuna Egiptomanta llujshishcata uyashpami richijlla nishcamanta arrepintirirca. Chaimi paipaj soldadocunataca: ‘Paicuna richunca mana saquinachu carcanchij. Macanacuna carrocunata allichichij, paicunata catishpa ringapaj’ nirca. Qꞌuipaca paipish, paipaj soldadocunapishmi israelitacunata catishpa rircacuna.

Jehovami paipaj pueblotaca punllaca pꞌuyuhuan, tutaca lunyacuj ninahuan achijyachishpa pushacurca. Chaimi Puca cuchaman pushashpa, caipi carpacunata shayachichij nirca.

Qꞌuipaca faraonpish, paipaj soldadocunapish catishpa shamucujtami israelitacunaca ricurcacuna. Paicunapaj ñaupajpi Puca cucha tiyashcamantami ni maiman mana ri tucurcacuna. Chaimantami Moisestaca: ‘Huañugrinchijmari, imapajtaj Egiptomantaca llujshichimurcangui’ nishpa caparircacuna. Chaimi Moisesca: ‘Ama manchaichijchu. Cunan Jehová ima shina ñucanchijta quishpichijta ricuichij’ nirca. Moisesca tucui shunguhuanmi Jehovapi confiarca.

Diosca israelitacunataca: ‘Carpa huasicunata tandaichij’ nircami. Chai tutaca Diosca pꞌuyutaca egipciocunapaj, israelitacunapaj chaupipimi churarca. Egipciocunapaj ladopica amsami carca. Cutin israelitacunapaj ladopica achijllami carca.

Qꞌuipaca Diosca Moisestaca: ‘Cambaj maquita yacu jahuata chutai’ nircami. Chaita rurajpimi tucui tuta jatun huaira shamurca. Huairaca Puca cuchata ishquipimi chaupirca. Achca israelitacunaca chaquishca ñanta purishpa caishuj ladoman pasarcacuna.

Faraonpaj soldadocunapish chai ñanllatataj rishpami israelitacunata catircacuna. Pero Jehová Dios soldadocunata muspachijpimi carrocunapaj ruedacunaca llujshircacuna. Chaimi soldadocunaca: ‘¡Caimanta jacuchij! Jehová Diosmari paipaj pueblomanta macanacucun’ nishpa caparircacuna.

Diosca Moisestaca: ‘Puca cucha jahuata cambaj maquita chutai’ nircami. Chaimi yacucunaca ñapish soldadocuna tucui taparca. Faraonpish, soldadocunapishmi huañurcacuna. Shujllapish mana quishpirircachu.

Caishuj ladoman pasashpami israelitacunaca: “Jatun macanacuita mishashcamantami Jehová Diosta cantasha. Caballotapish, caballopi purijtapish mama cuchapimi shitarca” nishpa Diosta alabarcacuna. Tucuicuna cantacujpica huarmicunapish panderetacunata tocashpami bailarcacuna. Quishpirishcamantami achcata cushicurcacuna.