Rahabca ishqui israelitacunatami pacarca

Jericó llajtata pacalla ricunaman rij israelitacunaca Rahab shuti huarmipaj huasipimi saquirircacuna. Jericota mandaj chaita yachaj chayashpami Rahabpaj huasiman soldadocunata cacharca. Paica chai ishqui israelitacunata paipaj huasi jahuapi pacashpami soldadocunamanca: ‘Ñami rircacuna, shujtaj ladocunata mashcagrichij’ nirca. Rahabca israelitacunataca: ‘Cancunataca ayudashami. Jehová Dios cai allpata cancunaman cunataca allimi yachani. Ñuca familiata ama huañuchipanguichij’ nishpami rogarirca.

Ishqui israelitacunaca Rahabtaca: ‘Shuj puca huascata ventanapi huarcushpa saquijpica cambaj huasi ucupi cajcunaca mana ima tucungacunachu. Chashnami cambaj familiaca quishpiringacuna’ nircami.

Rahabca chai israelitacunataca: ‘Ñuca huasi ventanamanta huascapi huarcurishpa uriyaichij’ nircami. Chashnami Jericomanta llujshichun ayudarca. Paicunaca quimsa punllacunata urcucunapi miticushpami Josuepajman tigrarcacuna. Chai qꞌuipami israelitacunaca Jordán yacuta pasashpa Jericó allpacunata dueñoyangapaj allichirircacuna. Jericó llajtami paicuna punta japina llajta cagrirca. Jehová Diosca Jericó muyundijta, punllapi shuj cutin muyuchunmi mandarca. Chaimi paicunaca seis punllacunata punllanta shuj cutin chai llajtata muyurcacuna. Canchis punllapica siete cutinmi muyurcacuna. Qꞌuipaca sacerdotecunami bocinapi tocarcacuna. Cutin soldadocunaca tucui fuerzahuanmi caparircacuna. Chai ratomi Jericopaj pircacunaca urmarca. Rahabpaj huasica pirca jahuapi cashpapish mana urmarcachu. Rahab Jehová Diospi confiashcamantami paipish, paipaj familiapish salvarircacuna.