Josuepish, gabaonitacunapish

Canaanpi tiyaj shujtaj llajtacunaca Jericopi ima tucushcatami yachaj chayarcacuna. Chaimi chai llajtacunata mandajcunaca israelitacunahuan macanacungapaj tandanacurcacuna. Pero Gabaonpi causajcunaca mauca churanata churarishpami Josuepajman rishpa: ‘Caru llajtamantami shamurcanchij. Jehová cancunamanta Egiptopi, Moabpi imalla rurashcatami uyashcanchij. Ñucanchijta mana llaquichijpica cancunatami sirvishun’ nircacuna.

Josueca paicuna nishcata crishpami mana llaquichishunchu nirca. Pero quimsa punllacuna qꞌuipaca gabaonitacuna mana carumanta cashcata, ashtahuanpish Canaanmanta cashcatami yachaj chayarca. Chaimi Josueca: ‘¿Ima nishpataj llullarcanguichij?’ nirca. Gabaonitacunaca: ‘Manchaimantami chashna nircanchij. Jehová Dios cancunamanta macanacujtami yachanchij. Ama huañuchihuaichijchu’ nircacunami. Josueca pai nishcata pajtachingapajmi imatapish mana rurarca.

Asha tiempo qꞌuipaca Canaanmanta cinco reycunami gabaonitacunata llaquichingapaj rircacuna. Josueca paipaj soldadocunahuanmi gabaonitacunata ayudanaman tucui tuta purishpa rircacuna. Macanacuica cayandij tutamantami callarirca. Cananeocunaca tucui ladocunatami miticushpa rircacuna. Pero Diosca jatun rumi shina rundutami paicunapaj jahuapi urmachirca. Chaipimi Josueca inti ama huashicuchun Diosta mañarca. Intica mana nunca huashicunata saquirishcachu carca. Shinapish Josueca Jehovapi tucui shunguhuan confiashcamantami chashna mañarca. Chaimi intica mana huashicurca. Chai punllaca israelitacuna Canaanpi reycunata, soldadocunatapish ganangacamami intica mana huashicurca.