Shuj patapimi quillcashca ricurirca

Huatacuna pasajpica Belsasarmi Babiloniata mandai callarirca. Shuj tutaca paica importante gentecunapajmi shuj jatun micuita rurarca. Belsasarca paita sirvijcunataca Diospaj huasimanta Nabucodonosor apamushca oro vasocunatami surcuchun mandarca. Chaimi jatun micuipi cajcunaca apamushca vasocunapi ubyai callarircacuna. Shinallataj paicunapaj dioscunatami adorai callarircacuna. Chaipimi ñapish shuj runapaj maqui ricurishpa patapi paicuna mana intindishca letracunata escribi callarirca.

Chaita ricushpaca Belsasarca achcatami mancharirca. Brujocunata cayashpami: ‘Chai quillcashcacuna ima nisha nishcata huillajmanca ñuca churashca mandajpaj qꞌuipa mandaj cachunmi churasha’ nirca. Pero ima nisha nishcataca pi mana huillai tucurcacunachu. Belsasarpaj mama chayashpaca: ‘Daniel shuti runami muscuicuna ima nisha nishcataca Nabucodonosorman huillaj carca. Paimi chai quillcashcacuna ima nisha nishcataca huillanga’ nircami.

Daniel chayajpica Belsasarca: ‘Quillcashcata liyishpa ima nisha nishcata huillajpica shuj oro collartami cusha. Ñuca churashca mandajpaj qꞌuipa mandajpish cachunmi churasha’ nircami. Danielca: ‘Regalocunataca mana ninichu. Quillcashca ima nisha nishcataca huillashallami. Cambaj yaya Nabucodonosor jatun tucushcami carca. Chaimantami Diosca humilde cachun yachachirca. Canpish chaita yachashca jahuami Diosta mana cazushcangui. Diospaj huasimanta apamushca vasocunapimi vinota ubyashcangui. Chaimi Diosca cai shimicunata escribirca: MENÉ, MENÉ, TEQUEL, PARSÍN. Chai quillcashcaca medocuna, persacuna Babiloniata llaquichishpa cambaj mandanatapish quichuna cashcatami ricuchin’ nircami.

Babilonia llajta muyundijpica jatun pircacunami tiyarca. Jatun yacupishmi pasaj carca. Chaimantami chaiman yaicunaca sinchi carca. Pero chai tutallatajmi medocuna, persacunaca Babiloniata llaquichircacuna. Persa llajtata mandaj Ciroca soldadocuna pungucunacama chayai pudichunmi yacuta shujtaj ladoman cachashpa chaquichirca. Chaiman chayajpica pungucunaca pascashcami carca. Soldadocunaca rato yaicushpami reytaca huañuchircacuna. Shinami Ciro runaca Babiloniata mandai callarirca.

Shuj huatata mandacushpami Ciroca: ‘Diosca Jerusalenpi paipaj huasita allichichunmi mandashca. Chaipi ayudanata munaj judiocunaca ringuichijlla’ nirca. Chaimantami Jerusalenta tucuchishca 70 huatacuna qꞌuipaca achcacuna chaiman tigrarcacuna. Shinami Diosca pai nishcata pajtachirca. Ashtahuanpish Ciroca Diospaj huasimanta Nabucodonosor apamushca oro vasocunata, cullqui vasocunata, shujtaj cosascunatapishmi tigrachirca. ¿Jehová Dios paipaj pueblota ayudangapaj Cirota imata rurachishcata ricurcanguichu?