Danieltaca leoncunapaj jutcupimi shitarcacuna

Media llajtamanta Darioca Babiloniata mandaj shujtaj reymi carca. Paica Daniel yachaisapa cashcata ricushpami shujtaj mandajcunata mandachun paita churarca. Pero chai mandajcunaca envidiamantami Danielta llaquichisha nircacuna. Paicunaca Daniel cada punlla quimsa cutin Diosta mañaj cashcatami yacharcacuna. Chaimantami Dariotaca: ‘Jatun mandajlla, canllata gentecuna mañachunmi shuj leyta churana cangui. Mana cazujtaca leoncunapaj jutcupimi shitana cangui’ nircacuna. Paicuna nishcacuna alli ricurijpimi Darioca chai leyta firmarca.

Chai ley llujshishcata Daniel yachashpaca paipaj huasimanmi rirca. Ña chayashpaca ventanata pascashpa, cungurishpami Diosta mañarca. Chai ratomi mandajcunaca Danielpaj huasiman yaicurcacuna. Daniel Diosta mañacujta ricushpami Darioman huillanaman callpashpa rircacuna. Reypajman chayashpami: ‘Danielca cantaca mana cazunchu. Punllapi quimsa cutinmi paipaj Diosta mañacun’ nircacuna. Shina nijpica Darioca Danielta llaquishcamantami huañuchichun mana munarca. Tucui punllami ima shina quishpichinata yuyacurcalla. Pero leypi ña firmashca cashcamantami mana imata rurai tucurca. Chaimi Danieltaca pꞌiña leoncunapaj jutcupi shitachun mandarca.

Chai tutaca Danielmanta sustarishpami Darioca mana dormi tucurca. Cayandij tutamanta jutcuman callpashpa rishpami: ‘¡Daniel! ¿Cambaj Diosca quishpichircachu?’ nishpa caparirca.

Darío caparijta uyashpami Danielca: ‘Jehová Diospaj ángel leoncunapaj shimita huichcajpimi ñucataca mana imata rurarca’ nirca. Chaimi Darioca achcata cushicushpa jutcumanta llujshichichun mandarca. Danieltaca leoncunaca mana aspishcallapishchu carca. Qꞌuipaca reyca: ‘¡Danielta juchachij mandajcunataca leoncunapaj jutcupi shitaichij!’ nircami. Shitajpica leoncunaca chai ratomi paicunata micurcacuna.

Darioca: ‘Leoncunapaj shimimanta Danielta quishpichij Diostaca tucuicunami cazuna canguichij’ nircami.

¿Canpish Daniel shina Jehová Diosta cada punlla mañanguichu?