Jesús huacharishcatami angelcunaca huillarca

Roma llajtata mandaj César Augustoca tucui judiocuna paicuna huacharishca llajtapi shuticunata quillcachichunmi mandarca. Chaimi Josepish, Mariapish Belén llajtaman rircacuna. Josepaj familiaca Belenmantami carca. Chaiman chayashca huashami Mariapajca huachana punlla pajtarca.

Belenpi pozada mana tiyajpimi paicunaca animalcuna huaquichina ucupi saquirircacuna. Chaipimi Mariaca huahuata huacharca. Chai huashami huahuataca telacunahuan maitushpa animalcunaman caranapi sirichirca.

Michijcunaca Belén cꞌuchullapimi ovejacunata tutapi cuidacurcacuna. Chaipimi ñapish shuj ángel ricurishpa Diospaj luzhuan achijyachirca. Michijcuna achcata mancharijpimi angelca: ‘Ama manchaichijchu. Ñucaca alli huillaitami cancunaman huillaj shamuni. Mesiasca cunanmi Belenpi huacharishca’ nirca. Chai ratomi achca angelcuna ricurishpa: ‘Diosca jahua pachapi alabashca cachun. Cai allpapipish sumaj causaita charichun’ nirca. Qꞌuipaca angelcunaca chingarircacunami. ¿Michijcunaca imatataj rurarcacuna?

Michijcunaca caishuj chaishujmi: ‘Belenman jacuchij’ nircacuna. Chai rato rishpami animalcuna huaquichina ucupi Mariata, Joseta, llullu huahuatapish ricurcacuna.

Michijcunaman ángel ima nishcata uyashpaca tucuicunami achcata mancharircacuna. Mariapish ángel ima nishcata yuyarishpami manataj cungarirca. Michijcunaca tucuita ricushcamanta, uyashcamantami Diosta pagui nishpa ovejacunata michinaman tigrarcacuna.