Jesustaca Jehovami cuidarca

Israel llajtapi inti llujshin ladopi causajcunaca maita rinata estrellacuna ricuchij cashcatami yuyajcuna carca. Shuj tutaca chaipi causaj runacunaca achijnicuj estrella laya cuyurijtami ricurcacuna. Chai estrellata catishpami chai runacunaca Jerusalenman chayarcacuna. Paicunaca: “¿Judiocunata jatun mandaj tucuna huahuaca maipitaj can? Paipaj ñaupajpimi cungurisha ninchij” nishpami tapurcacuna.

Jerusalenmanta rey Herodesca shuj mushuj rey tiyagrishcata yachashpaca achcatami sustarirca. Chaimantami Herodesca sacerdotecunata mandajcunata chai rey maipi huacharina cashcata tapurca. Paicunaca profetacuna nishca shinaca Belén pueblopi huacharina cashcatami huillarcacuna. Chashna nijpimi Herodesca estrellata catij runacunata cayashpaca: ‘Belén puebloman richij. Huahua maipi cashcata alli tapunguichij. Japishpaca huillanaman shamunguichij. Ñucapishmi paipaj ñaupajpi cungurisha nini’ nirca. Pero chaica mana ciertochu carca.

Chai estrellaca cutinmi cuyurishpa ri callarirca. Chaimi runacunaca catishpa Belenman chayarcacuna. Shuj huasi jahuapimi estrellaca shayarirca. Chaiman yaicushpaca Jesustapish, paipaj mamatapishmi ricurcacuna. Chaimi huahuapaj ñaupajpi cumurishpa orota, inciensota, mirratapish curcacuna. Pero ¿Jehová Dioschu chai runacunataca Jesuspajman cachashcanga? Mana.

Chai tutaca Diosca shuj muscuipimi Josetaca: ‘Jatari, huahuata paipaj mamandij pushashpa Egiptopi miticugri. Herodesca huahuata huañuchisha nicunmi. Ñuca huillangacama chaipi saquiringuichij’ nirca. Chai ratomi Joseca paipaj familiahuan Egiptoman rirca.

Jehová Diosca estrellata catij runacunataca: ‘Herodespajman ama tigranguichij’ nircami. Paicuna mana tigrajpica Herodesca achcatami pꞌiñarirca. Jesusta mana japi tucushcamantami Belenpi tucui Jesuspaj huiñai huahuacunataca huañuchinaman cacharca. Pero Jesusca ña Egiptopi cashcamantami mana ima tucurca.

Huatacuna pasajpica Herodesca huañurcami. Chaimi Jehová Diosca Josetaca: ‘Huahuata huañuchisha nijcunaca ña mana tiyanchu, tigraichijlla’ nirca. Chashna nijpimi Joseca Mariata, Jesusta pushashpa Israelman tigrashpa Nazaretpi causarca.