Joven Jesusmanta yachashun

Josepish, Mariapish Jesushuan, paipaj caishuj huahuacunahuanmi Nazaretpi causarcacuna. Joseca paipaj familiata mantiningapajmi carpintero carca. Shinallataj paica paipaj familiamanca Jehovamanta, paipaj Leymantapishmi yachachij carca. Tucui familiami Diosta adorangapaj sinagogaman rijcuna carca. Tucui huatacunapishmi Jerusalenman rishpa Pascua fiestata rurajcuna carca.

Jesús 12 huatacunata charijpica paipaj familiahuanmi Jerusalenman rircacuna. Chaimanca achca gentecunami Pascua fiestata rurangapaj rishcacuna carca. Pero Pascua fiesta ña tucurijpica Josepish, Mariapish paicunapaj huasimanmi tigracurcacuna. Paicunaca: ‘Jesusca ñucanchij familiahuanmi shamucunga’ nishpami yuyarcacuna. Pero paita mashcajpica mana ricurircachu.

Chaimantami Jerusalenman tigrashpa quimsa punllacunata Jesusta mashcarcacuna. Paitaca Diospaj huasipimi japircacuna. Jesusca yachachijcunata tapushpa, ima nijta uyashpami paicunapaj chaupipi tiyacushca carca. Yachachijcunaca Jesús ima nishcata uyashpa achcata mancharishpa paita tapui callarircacuna. Chaimi paicunaca Diospaj Leyta Jesús alli intindishcata ricurcacuna.

Josepish, Mariapish achcatami sustarishcacuna carca. Mariaca Jesustaca: ‘Huahua, ¿ima nishpataj cashna ruranguiyari? Achcata mancharishpamari mashcacurcanchij’ nircami. Jesusca: ‘¿Ñuca Yayapaj huasipi cana cashcataca manachu yacharcanguichij?’ nishpami cutichirca.

Jesusca paipaj yaya mamahuanmi Nazaretman tigrarca. Chaipimi Joseca paipaj trabajota Jesusman yachachirca. Caita yuyai. ¿Joven cashpaca Jesusca ima shinashi carca? Jesusca huiñashpa catishpami yachaisapa tucurca. Chaimantami Diospish, gentecunapish paitaca achcata cꞌuyarcacuna.