Juanca Jesús shamunatami huillarca

Juanca Zacarías y Elisabetpaj churimi carca. Jehová Diosmi paitaca profeta cachun agllarca. Paica Mesías ñalla shamunatami gentecunaman huillarca. Juanca sinagogacunapi o pueblocunapi huillanapaj randica chaquishca pambacunapimi huillaj carca. Juanta uyangapajca Jerusalenmanta, Judeamantami achcacuna shamuj carca. Juanca: ‘Yaya Diospaj ñaupajpi alli ricuringapajca mana alli ruraicunata saquinami canguichij’ nishpami huillaj carca. Achca gentecuna juchacunamanta arrepintirijpimi Juanca Jordán yacupi paicunata bautizaj carca.

Juanca minishtirishcacunallahuanmi causaj carca. Camello millma churanatami churarij carca. Langostacunatapish, mieltapishmi micuj carca. Gentecunaca paitami ashtahuan rijsinata munarcacuna. Jatun tucushca fariseocunapish, saduceocunapish paitami ricunaman rircacuna. Juanca paicunataca: ‘Mana allita ruranata saquishpa arrepintirichij. Abrahanpaj huahuacunami canchij nishpapish mana Diospaj huahuacunachu canguichij’ nircami.

Achcacunami Juantaca: ‘¿Diosta cushichingapajca imatataj rurana canchij?’ nishpa tapujcuna carca. Paica: ‘Pipish ishqui churanata charijca, mana charijman shujta cuchun’ nircami. ¿Imamantataj chashna cutichirca? Juanca Diosta cushichingapajca shujtajcunata cꞌuyana cashcatami paita catijcunaman yachachisha nirca.

Impuestota japijcunatapish: ‘Honrados caichij. Shujtajcunataca ama umaichijchu’ nircami. Soldadocunatapish: ‘Ama llullaichijchu. Imatapish japinaraiculla ama imata ruraichijchu’ nircami.

Sacerdotecunapish, levitacunapish Juanta ricunaman rishpaca: ‘Tucui gentecunami canta rijsisha nin’ nircacunami. Chaimi Juanca: ‘Profeta Isaías nishca shinaca ñucaca shitashca pambapi Diospajman cꞌuchuyaichij nishpa huillaj runami cani’ nirca.

Gentecunaca Juan yachachishcata uyanataca achcatami munarcacuna. Achcacunaca: ¿Paichu Mesías? nishpami tapurircacuna. Chaimantami Juanca: ‘Ñucapaj qꞌuipa shamujca ñucata yalli podertami charin, paipaj sandaliacunapaj huatucunallatapish mana pascai tucunichu. Ñucaca, cancunataca yacullahuanmi bautizani. Pero paica espíritu santohuanmi bautizanga’ nirca.