Jesusca Mesiasmi can

Juanca: “Ñucapaj qꞌuipa shamujca ñucata yalli podertami charin” nishpami huillacurca. Jesusca casi 30 huatacunata charishpami Galileamanta Jordán yacuman rirca. Chaipi gentecunata Juan bautizacujpimi Jesusca: ‘Ñucatapish bautizai’ nirca. Pero Juanca: ‘Ñucamari can bautizashca cana cani. ¿Maitataj canca ñucataca bautizai ninguiyari?’ nircami. Chashna nijpimi Jesusca: ‘Diosca canmi ñucata bautizachun munan’ nirca. Chaimi Juanca Jesustaca yacupi tucui pambarca.

Yacumanta llujshishca qꞌuipaca Jesusca Jehovatami mañarca. Chai ratomi jahua pacha pascarijpi Diospaj espíritu santo paloma shina shamushpa Jesuspaj jahuapi tiyarirca. Chaipimi jahua pachamantaca Jehová Diosca: ‘Caimi ñuca cꞌuyashca Churi. Paipimi cushicuni’ nirca.

Chashnami Jesusca Diospaj espíritu santota chasquirca. Chai punllamantami paica Cristo o Mesías tucurca. Cunanca Jesusca Jehová Dios mingashcatami cai Allpapi pajtachi callarirca.

Jesusca bautizarishca qꞌuipallaca shitashca pambamanmi rirca. 40 punllacunatami chaipi carca. Chai huashaca Juanta ricunamanmi rirca. Paipajman cꞌuchuyamucujpimi Juanca: “¡Ricuichij, paimari Diospaj Malta Oveja. Paimi cai pachamanta juchata anchuchinga!” nirca. Jesús Mesías cashcata gentecuna yachachunmi Juanca chashna nirca. ¿Shitashca pambapi Jesushuan ima tucushcata yachasha ninguichu? Catij yachaita ricui.