Diabloca Jesustami pandachisha nirca

Jesús bautizarishca qꞌuipaca Diospaj espíritu santoca shitashca pambamanmi paita pusharca. Jesusca 40 punllacunata mana micushcamantami achcata yaricachirca. Chaimi Diablo shamushpa Jesustaca: ‘Diospaj Churitaj cashpaca cai rumicunata tanda tucuchun niyari’ nirca. Shinapish Jesusca: ‘Quillcachishcapica: “Runaca micunallahuanca mana causanchu. Jehová Dios rimashca shimicunahuanmi causan” ninmi’ nircami.

Jesusta cutin pandachisha nishpaca Diabloca: ‘Diospaj Churitaj cashpaca Diospaj huasi jahua puntamanta huashicui. Quillcachishcapica canta japichun Diosca paipaj angelcunatami cachanga ninmi’ nircami. Pero Jesusca: ‘Quillcachishcapica: “Diostaca ama yangamanta caita chaita rurai nishpa mañangui” ninmi’ nircami.

Qꞌuipaca tucui cai pachapi gobiernocunata, chaipi tiyashcacunatapish Jesusman ricuchishpami Diabloca: ‘Ñucata shuj cutinlla adorajpica tucui caicunatami cusha’ nirca. Shina nijpimi Jesusca: ‘¡Anchui Satanás! Quillcachishcapica: “Jehovallatami adorana canchij” ninmi’ nishpa cutichirca.

Pandachinata mana valishpa Diablo rijpimi huaquin angelcuna shamushpa Jesusman micunata cararcacuna. Chai qꞌuipaca Jesusca Diospaj Gobiernomantami huillai callarirca. Chaita rurachunmi Jehová Diosca paiman mingashca carca. Jesús yachachishcata uyanata munashpami gentecunaca tucui ladocunaman paita catircacuna.