Jesusca achca milagrocunatami rurarca

Jesusca Diospaj Gobiernomanta huillanamanmi cai Allpaman shamurca. Shinallataj Diospaj espirituta chasquishpami milagrocunata rurarca. Chashnami pai mandacushpa chaita ruranata ricuchirca. Por ejemplo, tucui laya ungüitami Jesusca jambirca. Maiman rijpipish ungushcacuna jambihuai nijpica tucuicunatami jambirca. Ciegocunapish, sordocunapish, mana cuyurijcunapishmi alliyarcacuna. Jesuspaj churana filota japirishpapishmi alliyarcacuna. Paica demoniocunatapishmi llujshichirca. Huaquinpica pailla casha nijpipish gentecunaca tucui ladomanmi catijcuna carca. Chashnapish Jesusca tucuicunatami alli chasquirca.

Shuj punllaca mana cuyurij runatami Jesuspajman apamurcacuna. Pero gentecuna junda cashcamantami mana maita yaicui tucurcacuna. Chaimantami huasi techota anchuchishpa ungushcata uriyachircacuna. Chaipimi Jesusca ungushcataca: ‘Jatari, puri’ nirca. Pai puri callarijpica gentecunaca achcatami mancharircacuna.

Shujtaj punllaca shuj puebloman Jesús chayacujpimi lepra ungüihuan caj 10 runacunaca carumanta: ‘Jesús ayudahuai’ nishpa caparircacuna. Chai tiempopica Diospaj Leypica lepra ungüita charijcunaca shujtajcunapajmanca mana cꞌuchuyanachu carca. Shinapish alliyashca qꞌuipami Diospaj huasiman yaicui tucurcacuna. Jesusca chai 10 runacunataca: ‘Diospaj huasiman richij’ nijpimi rircacuna. Pero manaraj chayashpami alliyarcacuna. 10 runacunamantaca shujllami alliyashca cashcata ricushpa Yaya Diosta jatunyachingapaj, Jesusta pagui ningapajpish tigramurca.

Chashnallataj 12 huatacunata ancha ungushca shuj huarmimi achca llaquita apacushcamanta jambirinata munarca. Chaimi gentecunapaj chaupita rishpa Jesuspaj churana filopi japirishpalla chai rato alliyarca. Jesusca: ‘¿Pitaj ñuca churanapi japirirca?’ nircami. Chai huarmica manchaihuan cꞌuchuyashpami tucuita huillarca. Chaita uyashpaca Jesusca: ‘Huahua, ama manchashpa rilla’ nircami.

Sinagogata pushaj Jairo shuti runapish shamushpami Jesustaca: ‘Ñuca ushushimi ñalla huañugrin, ñuca huasiman shamupai’ nirca. Pero Jesús manaraj chayajpimi Jairopaj ushushica huañurca. Ña chayajpica familiacunapish, amigocunapishmi huacacurcacuna. Chaita ricushpami Jesusca: ‘Ama huacaichijchu, huahuaca dormicunllami’ nirca. Qꞌuipaca huahuapaj maquita japishpami: “Huahua, cantaca ¡jatari! ninimi” nijpi jatarirca. Chai qꞌuipaca yaya mamataca: ‘Huahuaman micunata caraichij’ nircami. Paicunaca achcatami cushicushcanga ¿nachu?