Jesusca Diospaj Gobiernomantami huillarca

Bautizarishca asha punllacuna qꞌuipaca Jesusca: ‘Diospaj Gobiernoca ñamari cꞌuchuyamucun’ nishpami huillai callarirca. Jesusta catijcunaca paihuanmi Galilea, Judea llajtacunata purircacuna. Nazaret llajtaman tigrashpaca Jesusca sinagogamanmi rirca. Chaipimi Isaías quillcashcata pascashpaca: ‘Alli huillaicunata huillachunmi Diosca espíritu santota ñucaman curca’ nishpa sinchita liyirca. Gentecunaca milagrocunallata rurachunmi munarca. Pero Jesusca alli huillaicunata huillangapajmi espíritu santota chasquishca carca. Chaimantami uyajcunataca: “Cai shimicunaca cunan punllami pajtarin” nirca.

Chai qꞌuipaca Galilea mama cuchamanmi Jesusca rirca. Chaipimi Pedrota, Andresta, Santiagota, Juantapish ricurca. Paicunaca pescadocunata japijcunami carca. Qꞌuipaca Jesusta catijcunami tucurcacuna. Jesusca: “Ñucata catichij. Cancunataca pescadocunata mashcaj shina gentecunata mashcanatami yachachisha” nircami. Chashna nijpimi chai rato paicunapaj trabajocunata saquishpa Jesusta catircacuna. Paicunaca tucui Galilea llajtata rishpami mercadocunapi, sinagogacunapi, callecunapi Diospaj Gobiernomanta huillarcacuna. Maiman rijpipish achca gentecunami paicunata catircacuna. Jesús rurashcacunaca Siria llajtacamami uyarirca.

Qꞌuipaca Jesusca ungushcacunata jambichun, demoniocunata llujchichunmi huaquin discipulocunamanca poderta curca. Cutin shujtajcunaca Jesushuanmi cada llajtaman rishpa huillarcacuna. Shinallataj María Magdalena, Juana, Susana, shujtaj huarmicunapishmi Jesustapish, paita catijcunatapish atindijcuna carca.

Jesusta catijcunaman ima shina huillanata yachachishca qꞌuipaca paica huillanamanmi cacharca. Galilea pueblocunapi huillajpica achcacunami bautizarishpa Jesusta cati callarircacuna. Achcacuna Jesusta catisha nishcamantami paica granocunata ña cosechanalla cashcahuan chꞌimbapurarca. Jesusca: ‘Granocunata ashtahuan cosechajcuna tiyachun Jehovata mañaichij’ nircami. Qꞌuipaca 70 discipulocunata agllashpami tucui Judeapi huillachun ishqui ishqui cacharca. Paicunaca Diospaj Gobiernomantami tucuicunaman huillarcacuna. Tigramushpaca imallata rurashcatami cushilla Jesusman huillarcacuna. Gentecunaman huillashpa catichunca Diabloca mana jarcai tucurcachu.

Jesusca: ‘Tucui llajtacunapi Diospaj Gobiernomanta huillaichij. Diospaj Shimita yachachishpa paicunata bautizaichij’ nircami. Jesusca jahua pachaman rina cashcata yachashcamantami paita catijcuna huillashpa catichun tucuita allichishpa saquirca.