Jesusca cielomanmi tigrarca

Jesusca Galileapimi discipulocunahuan tandanacurca. Chaipimi: ‘Tucui llajtacunaman rishpa ñucata catijcuna tucuchun yachachigrichij. Ñuca tucui mandashcacunata yachachishpa bautizanguichij’ nirca. Qꞌuipaca: ‘Cancunahuanca tucui punllacunami casha. Chaitaca amataj cungaringuichijchu’ nircami.

Jesús causarishca qꞌuipaca Galileapi, Jerusalenpimi 40 punllacunacama achca discipulocunapajman ricurirca. Shinallataj valishca consejocunata, achca milagrocunatapishmi rurarca. Ña ultimotaca Olivos urcupi apostolcunahuanmi tandanacurca. Jesusca: ‘Ñuca Yaya imata cusha nishcata cungacama, Jerusalenmanta amaraj ringuichijchu’ nircami.

Jesús ima nicushcata mana intindishpami apostolcunaca: ‘¿Cunanllatajchu Israel llajtata mandagringui?’ nircacuna. Chaimi Jesusca: ‘Ñuca rey cachunca Jehová Diosca manaraj munanchu. Pero cancunaca ñallami espíritu santota chasquishpa imatapish rurai tucunguichij. Chaimantami Jerusalenpi, Judeapi, Samariapi, cai allpapi tiyaj caru llajtacunapipish ñucamanta huillanguichij’ nirca.

Qꞌuipaca Jesús jahua pachamanmi ri callarirca. Chaimi discipulocunaca shuj pꞌuyupi Jesús chingaringacama huichilla ricushpa saquirircacuna.

Discipulocunaca Olivos urcumantami Jerusalenman tigrarcacuna. Chai llajtapimi shuj huasi jahua pisopi tandanacujcuna carca. Diostapish mañajcuna carca. Paicunaca chai huasipimi imata rurana cashcata Jesús huillachun shuyacurcacuna.