Espíritu santotami discipulocunaca chasquircacuna

Jesús jahua pachaman tigrashca punllamantaca ñami 10 punllacuna pasashca carca. Chai qꞌuipami discipulocunaca espíritu santota chasquircacuna. Huata 33-pimi Pentecostés nishca fiestamanca shujtaj ladocunamanta Jerusalenman shamurcacuna. 120 discipulocunami huasi jahua pisopi tandanacurcacuna. Chaipica ñapishmi nina lunyacuj shina discipulocunapaj uma jahuapi ricurirca. Chaimi tucuicuna chꞌican chꞌican shimicunapi rimai callarircacuna. Ashtahuanpish shuj jatun huaira huajiashcami chai huasipica uyarirca.

Jerusalenman shamuj gentecunaca huaira huajiacushcata uyashpami ima tucushcata ricunaman callpashpa rircacuna. Chayajpica discipulocuna shujtaj shimicunapi rimacujta ricushpami mancharircacuna. Paicunaca: ‘Cai gentecunaca Galileamantamari can. ¿Ima shinataj ñucanchij rimashca shimipi rimai tucuncuna?’ nircacunami.

Chaimi Pedroca apostolcunandij tucuicunapaj ñaupajpi shayarircacuna. Pedroca: ‘Cancunaca Jesustami huañuchircanguichij. Pero Diosmi paitaca causachirca. Cunanca Jesusca Diospaj alli ladopimi tiyacun. Pai cusha nishca Diospaj espiritutapishmi cushca. Chaimi milagrocunata rurashcata ricushcanguichij, uyashcanguichijpish’ nircami.

Chaita uyashpami gentecunaca shungumanta llaquirishpa Pedrotaca: ‘¿Imatataj rurana canchij?’ nircacuna. Pedroca: ‘Juchacunamanta arrepintirishpa, Jesuspaj shutipi bautizarishpami espíritu santota chasquinguichij’ nircami. Chai punllaca 3.000 gentecunami bautizarircacuna. Chai punllamantami Jerusalenpica discipulocunaca mirarishpa catircacuna. Diospaj espíritu ayudajpimi apostolcunaca congregacioncunata mirachishpa Jesús mandashcacunata discipulocunaman yachachijcuna carca.