Pedroca Jesustami negarca

Jesuspish, paipaj apostolcunapish huasi jahua pisopi cajpimi pai huañunata yuyarichun mandashca carca. Chaita mandashca qꞌuipaca: ‘Cunan tutallataj ñucataca tucuicuna shitashpami ringuichij’ nircami. Pedroca: ‘Tucuicuna shitashpa rijpipish ñucaca manataj saquishachu’ nircami. Chaimi Jesusca: ‘Gallo manaraj cantajpimi ñucataca quimsa cutin mana rijsinichu ningui’ nirca.

Soldadocuna Caifaspaj huasiman Jesusta pushangacamami casi tucui apostolcuna miticushpa rishcacuna carca. Pero ishqui apostolcunaca huashallami catishpa rircacuna. Paicunamantaca shujca Pedromi carca. Paica Caifaspaj huasi patioman yaicushpami ninapi cununaman cꞌuchuyarca. Nina achijyachijpimi shuj huarmica: ‘Cantaca rijsinimi, Jesushuan purijmi cangui’ nirca.

Pedroca: ‘Imatachari nicungui’ nishpami huasi pungucama rirca. Paita ricushpami shujtaj sirvij huarmica: ‘Cai runaca Jesushuanmi purij carca’ nirca. Chaimi Pedroca cutinllataj: ‘Jesús pi cashcataca mana yachanichu’ nirca. Qꞌuipaca shujtaj runapish: ‘Canpish galileopurallatajmi cangui. Jesús shinami rimangui’ nijpimi Pedroca: ‘Mana llullacunichu. Chai runataca manataj rijsinichu’ nirca.

Chai ratomi shuj gallo cantarca. Chaimi Pedroca Jesús paita ricucujta ricurca. Pedroca Jesús ima nishcata yuyarishpami canllaman llujshishpa, achcata llaquirishpa huacarca.

Chai tiempopica sacerdotecunami tandanacushpa juiciota rurajcuna carca. Chaimantami sacerdotecunaca Caifaspaj huasipi Jesusta juzgangapaj ña tandanacushcacuna carca. Paicunaca Jesusta huañuchingapajmi shuj yuyailla tucurcacuna. Pero chaita rurangapajca imata mana juchachi tucurcacunachu. Ultimopica Caifasca: ‘¿Yaya Diospaj Churichu cangui?’ nishpami tapurca. Jesusca: ‘Ari, ñucaca Diospaj Churimi cani’ nircami. Chaipimi Caifasca: ‘¡Chashna nishpaca Diostamari cꞌamicun!’ nirca. Chashna nishcamantaca sacerdotecunapish: ‘Paica huañunami can’ nircacunami. Qꞌuipaca Jesustaca chꞌucashpa, ñahuita tapashpa huajtashpami: ‘Profeta cashcata ricuchiyari. ¿Pitaj cantaca macarca? Huillai’ nircacuna.

Punllayajpica Jesustaca sacerdotecuna tandanacuna huasimanmi aparcacuna. Chaipimi: ‘¿Yaya Diospaj Churichu cangui?’ nishpa cutin tapurcacuna. Jesusca: ‘Cancuna nishca shinallataj chaimi cani’ nircami. Chashna nijpimi paicunaca: ‘Diostamari cꞌamicun’ nircacuna. Qꞌuipaca mandaj Poncio Pilatopaj palaciomanmi aparcacuna. ¿Chaipica paitaca imatataj rurarcacuna? Ricushun.