Diospaj Gobierno mandanaman shamuchun

Jehová Diosca: ‘Cancunapaj ñahuicunamantaca tucui huiquitami pꞌichasha. Huañuipish, huacaipish, nanaipish mana tiyangachu. Ñaupa llaquicunataca ña mana yuyaringuichijchu’ nircami.

Jehová Diosca Adantapish, Evatapish paillata adorashpa cushilla causachunmi Edén huertapi churarca. Shinallataj Diosca paicuna achca huahuacunata charishpa cai allpapi jundarichunmi munarca. Pero paicunaca Diospaj munaitaca mana pajtachircacunachu. Shinapish Diosca paipaj munaitaca mana cambiashcachu. Cai tucui yachaicunapica Yayitu Dios pai nishcacunata siempre pajtachij cashcatami yachashcanchij. Diospaj Gobiernopi Jesús mandacujpica achca bendicioncunatami charishun. Chashnami Dios Abrahanman cusha nishcaca pajtaringa.

Cai Allpapica ñallami Diablopish, demoniocunapish, millai gentecunapish ña mana tiyanga. Chaipica tucuicunami Diosllata adorashun. Ungüipish, huañuipish ña mana tiyangachu. Imata rurangapajpish achca fuerzata charishcamantami cushilla sintirishun. Mishqui micunacunatapish, alli huasicunatapishmi charishun. Shinallataj sacha animalcunata manchanapaj randica paicunahuanmi tandalla causashun. Cai Allpaca shuj alaja paraisomi tucunga.

Jehová Dios huañushcacunata causachi callarijpica achcatami cushicushun. Abel, Noé, Abrahán, Sara, Moisés, Rut, Ester, Davidpish causarijpica cushicushpami paicunataca chasquishun. Paicunahuanmi cai Allpataca shuj alaja paraisota rurashun. Chaipica tucui laya sumaj trabajocunatapishmi rurashun.

Yaya Diosca canpish chai Paraisopi causachunmi munan. Chaipica canca Diosmantami ashtahuan yachangui. Chaimanta cunanmantapacha Yayitu Diospajman cꞌuchuyashpa catishunchij.