Callari shimicuna

Diosta sirvijcunata ayudaj versocuna nishca publicacionca Bibliapi tiyaj versocunata jahualla japingapajmi ayudanga. Cai versocunaca ñucanchij causaipi ñaupajman catichunmi ayudanga. Shinallataj cai publicacionpica shujtajcunata animangapaj ima versocunata utilizana cashcatami ricuchinga. Shina animarishpami paicunapish, paicunapaj decisioncunahuan Jehová Diosta jatunyachi tucungacuna. Puntapica can munashca temata mashcai. Chai ucupica huaquin tapuicunata Bibliamanta alli intindichishca versocunatami ricui tucungui (“¿Ima shinataj cai publicacionta utilizai tucunchij?” nishca recuadrota ricui). Caipica Bibliamanta japishca cushichij, animachij versocunatami taringui. Ashtahuanpish ñucanchijtapish, shujtajcunatapish ayudangapaj valishca versocunatami ricungui.

¿Ima shinataj cai publicacionta utilizai tucunchij?

Cai publicacionca siete partecunatami charin. Caicunaca: Problemacuna, Alli comportarina, Congregación, Ñucanchij causai, Familia, Feta sinchiyachina, Cualidadcuna nishca partecunami can. Caicunamanta shujta agllashpami can agllashca partepaj chꞌican chꞌican temacunata ricungui. Mana cashpaca can munashca temata “mashcai” nishcapimi escribi tucungui. Shinapish shuj tema maijan partepi cashcata mana yachashpaca Tucuicuna nishcapi llapi. Chaipica tucui temacunami shuj listapi ricuringa. Can munashca temaman yaicujpica huaquin yuyaicunatami ashtahuan yanapi escribishcata ricungui. Chai yuyaicunamanta huaquincunaca tapui shinami ricuringa. Chai yuyaicuna urapica versocunami ricuringa. Chai versocunata mashcashpami chaicunapi alli yuyanaraj cangui. Shinami chai versocuna ashtahuan yanapi caj yuyaicunahuan imata ricunata charishcata cuentata cungui. Shinallataj huaquinpica informacionta utca japichunmi ashtahuan yanapi caj yuyaicunapaj ucupica chꞌican yuyaicuna ricuringa. Huaquinpicarin huaquin versocunapaj ladopica “ricui” nishcatapishmi ricungui. Cai versocunaca temacunata ashtahuan alli intindichunmi ayudanga. Shinallataj chaicunapica “Ñucanchijta ayudangapaj ejemplocuna” nishcapishmi achca cutin ricuringa. Chai ura ladocunapica Bibliamanta versocuna, valishca yuyaicunapishmi ricuringa. Chai yuyaicunata liyishpaca chai versocuna imamanta parlacushcatami alli intindingui.

Cai publicacionca cada temapaj huaquin versocunallatami ricuchinga. Chashnami chai temamanta ashtahuan investigashpa catichun ayudanga (Pr 2:1-6). Ashtahuan yachangapajcarin Diospaj Shimi Traducción del Nuevo Mundo Bibliapica referenciacunata, notas de estudio nishcacunatapishmi ricui tucungui. Shinallataj Testigo de Jehovacuna estudiachun nishca publicaciontami utilizai tucungui. Chaipica shuj verso ima nisha nishcatami ashtahuan alli intindingui. Chaipajca chai publicacioncuna actualizashca cashcatami ricuna cangui.

Cai publicacionca Bibliapi tiyaj alli yachaita charichunmi ayudanga. Cai publicacionta estudiashpa catishpaca canllatajmi “Diospaj shimi causaj cashcata, achca poderta charishcatapish” intindingui (Heb 4:12).