3 Llaquicunata ahuantachunmi ayudan

Huaquin llaquicunataca cunan punllacunaca mana allichi tucunchijchu. Por ejemplo, shuj millai ungüita charishcamanta o shuj familia huañushcamantachari llaquilla causacungui. Cai laya llaquicunata ahuantashpa catingapajca ¿Yayitu Diosca canta ayudangachu?

MILLAI UNGÜICUNATA CHARIJPICA DIOSCA ¿IMA SHINATAJ AYUDAN?

Rosaca: “Huacharishcapachamantami shuj millai ungüita charini. Chai ungüita charishcamantami achca nanaihuan causani” nircami. Pero Mateo 19:26-nishcata leyishpami Rosaca cushilla sintirirca. Chaipica: “Diospajca imapish jahuallami” ninmi. Rosa huarmica Bibliata ima shina estudianatami mashcarca. Achca nanaita charishcamantami imata leyinataca mana pudirca. Chaimantami Bibliata, librocunata grabashcata uyai callarirca.a Rosaca: “Chashna ayudacunata charishcamantami Yaya Diostaca cushilla sirvi tucuni” nircami.

Rosa huarmica ñaupa shina imatapish mana rurai tucushcamantami huaquinpica llaquilla sintirin. Pero ama chashna sintiringapajca 2 Corintios 8:12-pi nishcatami yuyaipi charin. Chaipica: “Maijanpish tucui shunguhuan ima charishcata cujpica, Diosca chasquinllami. Diosca imata mana charishcataca mana mañanchu” ninmi. Cai versopi ricuchishca shinaca ñucanchij rurai pudishcata tucui shunguhuan rurajpica Jehová Diosca cushillami sintiringa.

SHUJ FAMILIA HUAÑUJPICA DIOSCA ¿IMA SHINATAJ AYUDAN?

Dianaca: “18 huatacunata charij ñuca ushushi huañujpimi dimastij llaquirircani. Cashna llaquihuanca ima shinataj causashari nijmi carcani” nircami. Paica Salmo 94:19-ta leyishpami achca animota japirca. Chaipica: ‘Llaquicunahuan dimastij sustaricujpipish, Diosmari cushichishpa ñuca almata samachirca’ ninmi. Dianaca: “Chai llaqui horascunapi imata ruranata yachangapajca Yaya Diostami mañaj carcani” ninmi.

Huahuacunaca dibujocunata pintangapajca colorescunatami charincuna. Huaquin colorcuna pꞌaquirishca cashpapish pintanapajca valinrajmi. Dianaca chai pꞌaquirishca colorsito laya cashpapish shujtaj gentecunata ayudai tucushcatami cuentata curca. Chaimantami gentecunata ayudanata munashpa voluntaria shina trabajai callarirca. Paica: “Gentecunata Bibliahuan animota cucushpaca ñucamanpish Jehová Dios animacushca layami sintircani” nircami. Ñaupa tiempopi Diosta sirvijcunaca achca llaquicunatami charircacuna. Chai llaquicunata ahuantashpa catingapajca Yaya Diostami tucui shunguhuan mañajcuna carca. Bibliapi paicunamanta leyishpami Dianaca Yaya Diosta tucui shunguhuan mañana cashcata intindirca. Paica: “Bibliata leyishpallami llaquicunata ahuantai tucurcani” ninmi.

Bibliapica shamuj punllacunapi alhaja causai tiyanatami huillan. Por ejemplo, Hechos 24:15-pica: ‘Cashcata rurajcunatapish, mana cashcata rurajcunatapish Taita Diosmi causachinga’ ninmi. Huañushcacuna causarinata yachashpami Dianaca cushilla sintirin. Paica: “Yayitu Dios agllashca punllapi ñuca ushushi causarinataca tucui shunguhuanmi crini. Pai causarijpica ima shinami huacharishca horas cushilla sintirircani, chashnallatajmi dimastij cushilla sintirisha” nircami.

a Publicacioncuna grabashcataca Internetman yaicushpa jw.org-pimi descargai tucungui.

Achca llaquicunata charijpica Bibliaca cushichishpami ayudan.

¿YAYITU DIOSCA IMA SHINATAJ ÑUCANCHIJTA AYUDAN?

Bibliapica: “Mandaj Diosca, tucui paita mañajcunapajca cꞌuchullapimi. Tucui shunguhuan paita mañajcunapajca cꞌuchullapimi. Paita manchajcuna imata yuyarishcataca pajtachingami. Paicuna mañashcata uyangami. Paicunataca quishpichingami” ninmi (Salmo 145:18, 19). Cai shimicunaca achcatami ñucanchijta cushichin. Pero ¿Diosca ñucanchij mañashcacunataca ima shinataj cutichin?

FUERZASTA CUSHPA

Ima problemata charishpaca huaquinpica llaquilla, shaicushcami sintirinchij (Proverbios 24:10). Llaqui horaspica ‘Jehová Diosmi shaicushcacunamanca, fuerzata cun. Fuerzata mana charijcunamanpish fuerzatami mirachin’ (Isaías 40:29). Apóstol Pablopish achca llaquicunatami charirca. Paica: “Ñucata sinchiyachij Jehová Dioshuanca, tucui imatapish rurai tucunimi” nircami (Filipenses 4:13, NM). Yaya Diosca espíritu santota cushpami Pablotaca sinchiyachirca. Ñucanchijmanpish espíritu santota cuchun mañajpica paica cungallami (Lucas 11:13).

YACHAITA CUSHPA

¿Bibliata alli intindingapaj, chaipi yachashcacunata ñucanchij causaipi pajtachingapajca imatataj rurana canchij? Discípulo Santiagoca: ‘Cancunamanta maijan yachai illaj cashpaca, Diosta mañaichij. Paica mana mitsashpami, tucuicunaman yallitaj cunga’ nircami (Santiago 1:5). Yaya Dios ñucanchij mañashcacunata cutichichunca Bibliatami leyina canchij, pai mandashcacunatapish cazunami canchij (Santiago 1:23-25). Chaita rurashpami Diospaj mandashcacuna ñucanchijpaj alli cashcata ricushun.

CASILLA CAUSAITA CUSHPA

Ama yallimana sustarishpa causangapajca Yaya Diostami ayudata mañai tucunchij. Diospaj Shimipica: “Imamantapish ama llaquilla canguichij. Ashtahuanpish Diosta mañacushpaca paiman tucuita huillaichij. Tucui imamantapish Diosta mañashpaca pagui nichij. Chashna rurajpimi pipish mana yachaipaj Diospaj sumaj causaica, cancunapaj shungucunata, cancunapaj yuyaicunatapish Cristo Jesuspi huaquichinga” ninmi (Filipenses 4:6, 7).

Bibliapica tucui problemacunaca ñallami tucuringa ninmi. Shinapish ñucanchij problemacunata mana utca allichi tucushpaca, ‘Diosca ñuca mañashcataca mana uyanchu’ nishpaca mana yuyanachu canchij. Chashna problemacunallataj ricurishpa catijpica Yaya Diosta mañanataca manataj saquinachu canchij. Paimi chai problemacunata ahuantashpa catichun ñucanchijman fuerzasta cunga (1 Corintios 10:13).