¿Maijan profeciacunallataj pajtarishca?

Ña yachashca shinaca Grecia llajtamanta curaca mana achijta huillashpami Creso runataca pandachirca. Chaimantami Cresoca Persiamanta soldadocunahuan macanacushpa pirdirca. Pero Bibliapica ima tucunataca achijtami huillan. Por ejemplo, Persia llajtata mandaj imata ruranatami huillarca. Chai profeciaca tucuimi pajtarirca.

Profeta Isaiasca 200 huatacuna huashamanmi chai mandaj manaraj huacharijpi, paipaj shuti Ciro canata huillarca. Shinallataj Babilonia llajtata Ciro ima shina tucuchinatapishmi huillarca.

Isaías 44:24, 27, 28-pica: ‘Canta Quishpichij Mandaj Diosca cashnami nin: Allpa ucupi caj yacucunata chaquirichij nijca ñucami cani. Cancunapaj jatun yacucunatapish ñucami chaquichisha. Cirotaca: Ñuca michijmi nijca ñucami cani. Paimi ñuca imalla munashcataca tucuita pajtachinga. Jerusalentaca cutin allichinga nijca ñucami cani. Diospaj huasita shayachinapaj callari rumita churangami nijca ñucami cani’ ninmi.

Historiamanta parlaj Heródoto nishca shinaca Ciroca Babiloniata pasaj Éufrates yacutami chaquichirca. Chashnami paipaj soldadocunahuanca yacu chaquishcata pasashpa Babilonia llajtata dueñoyarcacuna. Babiloniata dueñoyashca qꞌuipaca Ciroca prezupi caj israelitacunatami Jerusalenman tigrachun saquirca. Jerusalenca 70 huatacuna huashamanmi llaquichishca carca. Chaimantami israelitacunaca cutin Jerusalenta allichina carcacuna.

Isaías 45:1, QC, 1989-pica: ‘Mandaj Diosca, paita sirvichun agllashca mandaj Cirotaca cashnami nin: Ñucami cantaca llajtacunata cumurichingapaj alli maquimanta charicuni. Cambaj ñaupajpica jatun mandajcunapaj chumbitapish pascagrinimi. Pueblo pungucunatapish pascashami. Chaitaca pi mana huichcangachu’ ninmi.

Babiloniocunaca pungucunata huichcanatami cungarishcacuna carca. Chai jatun pungucunatami Persia llajtamanta soldadocunaca yaicurcacuna. Babilonia llajtata llaquichingapaj Ciro yaicugricushcata yachashpaca tucui pungucunatami huichcancunaman carca. Chaita mana rurashcamantami Babiloniamanca jahualla yaicurcacuna.

Bibliapica shujtaj profeciacunapishmi tiyan. Tucuimi pajtarishca.a Ima tucunata huillaj gentecunaca yanga dioscunata tapushpami llullacunata nincuna. Pero Bibliapi tiyaj profeciacunaca mana llullaj Dios quillcachishcami can. Chaimantami tucui pajtarin. Diosca: “Ñucami qꞌuipa punlla imalla tucunataca, callarimantapacha tucuita huillani. Ñucaca ñaupa punllamantatajmi qꞌuipa punllapi ñuca imata ruragrishpaca manaraj chaita rurashpa huillani” ninmi (Isaías 46:10).

Diosllami Isaías 46:10-pi nishcata pajtachi tucun. Chaimantami Jehová shuti can. Paillami shamuj punllacunapi ima tucunata, ima shina ruranatapish huillai tucun.

HUAQUIN PROFECIACUNACA CUNAN PUNLLAMI PAJTARICUN

Yayitu Diosca cunan punllacunapi imalla tucunatami achca huatacuna huashaman huillarca. Por ejemplo, casi dos mil huatacuna huashamanmi, “cai punllacuna tucurinapajca llaqui punllacunami shamunga” nirca. Shinaca, ¿cai Allpapish, gentecunapish tucuringachu? Mana. Ashtahuanpish tucui llaquicuna, macanacuicunami tucuringa. Chai tucui llaquicunamantami gentecunaca sufrishpa causashcacuna. Cunanca cai tucuri punllacunapi imalla pajtaricushcata ricushun.

2 Timoteo 3:1-5-pica: “Chai punllacunapica quiquinlla alli canata munajcuna, quiquinpajlla charinata munajcuna, jatun tucushcacuna, valishca tucujcuna, Taita Diosta cꞌamijcuna, yaya mamata mana cazujcuna, mana pagui nijcuna, Taita Diosta mana rijsijcuna, rumi shungucuna, pꞌiñarishpapish manataj cungarijcuna, yangamanta juchachijcuna, mana jarcari tucujcuna, pꞌiña millaicuna, allita pꞌiñajcuna, quiquinpurallatataj llaquipi churajcuna, jahualla pꞌiñarijcuna, imapish mana caipajta yuyajcuna, Taita Diosta mashcanapaj randica aicha munaipi cushicunallatami cꞌuyangacuna. Ricuipica Dios yuyailla caj shinami cangacuna. Ashtahuanpish paicuna rurashcahuanca Diosca mana tiyashca cashcatami ricuchingacuna” ninmi.

Chashna laya gentecunaca ashtahuanmi miracun. Jatun tucushca, paicunallapi yuyajcuna, charinallapi yuyajcunapurapimi causacunchij. Gentecunaca paicuna munashcata rurachunllami munan. Pero paicunaca mana ayudasha nincunachu. Shinallataj huahuacunaca yaya mamata mana cazuncunachu, gentecunaca Diosta yuyarinapaj randica aicha munaillapimi yuyancuna. ¿Quiquinca chaita ricushcanguichu?

Mateo 24:6, 7-pica: ‘Jatun macanacuicunami tiyanga, shujtaj llajtacunapipish ñami macanacugrin ninacujtami uyanguichij. Mama llajtaca caishuj mama llajtahuan macanacungacunami’ ninmi.

1914 huatamantaca 100 millón yalli gentecunami macanacuicunapi huañushcacuna. Macanacuicunaca mana tucurishcachu. Chaimantami gentecunaca llaquilla causancuna.

Mateo 24:7-pica: ‘Yaricaicunami’ tiyanga ninmi.

Programa Mundial de Alimentosca: “Gentecunapajca suficiente micunami tiyan. Pero 815 millón gentecunami suficiente micunata mana charincuna. Shinallataj quimsamantaca shujmi mana alli micushpa ungun” ninmi. Cada huatami 3 millón huahuacunaca yaricaimanta huañuncuna.

Lucas 21:11-pica: ‘Chꞌican chꞌican llajtacunapica allpa chujchuicunami tiyanga’ ninmi.

Cada huatami achca terremotocuna tiyan. Huaquin terremotocunapica achca huasicunami urmashca, mirga gentecunapishmi huañushca. 1975 huatamanta 2000 huatacamaca 471 mil gentecunami terremotocunapi huañushca.

Mateo 24:14-pica: “Dios mandacun alli huillaitaca, tucui cai pachapi causajcunamanmi huillashpa yachaj chayachishca canga. Chai qꞌuipami cai shina causaica tucuringa” ninmi.

Tucui muyundij Allpapica 8 millón yalli testigo de Jehovacunami tiyan. 240 yalli llajtacunapimi Diosmanta yachachicuncuna. Mateo 24:14-pi nishca shinaca Dios munashca horascamami huillashpa catingacuna. Chai qꞌuipami “cai shina causaica tucuringa”. Caita nishpaca cai mundopi gobiernocuna tucurinata, Jesús cai Allpata mandai callarinatami parlacun. ¿Jesús mandai callarishpaca imatataj ruranga? Ashtahuan yachangapajca catij temata leyipai.