Diosca ñallami llaquicunata tucuchinga

Habacuc shuti runaca: “Mandaj Dioslla, ¿maicamataj mañacushallari? manataj uyahuanguica. ¿Maicamataj llaquicunataca huillacushallari? manataj quishpichihuanguica” nircami (Habacuc 1:2, 3). Cai runaca ¿Diospi mana confiashpachu cashna nirca? Mana. Paica Diospaj ñaupajpica alli runami carca. Chaimantami Yaya Diosca llaquicunata tucuchina cashcata paiman huillarca (Habacuc 2:2, 3).

Ñucanchijpish o ñucanchij familiacunapish llaquicunata charijta ricushpami ¿imamantataj Diosca mana ayudan? nishpa huaquinpica tapurinchij. Pero Bibliapica: “Maijan gentecuna yuyashca shinaca Jehová Diosca pai cusha nishcata pajtachingapajca mana uniyanchu. Paica shujllapish ama chingarichun, ashtahuanpish tucuicuna arrepintirichunmi cancunamanca pacienciata ricuchin” ninmi (2 Pedro 3:9, NWT).

¿DIOS NISHCACUNACA IMA HORATAJ PAJTARINGA?

Jesusca ‘cai shina causai tucurinapajca’ ima llaquicuna tiyana cashcatami huillarca. Shinallataj paica, “cunan punllacunapi causacujcunaca, cai huillashcacuna pajtangacama manaraj huañungacunachu” nircami (Mateo 24:3-42). Cunan punllacunami cai profeciacunaca ña pajtaricun. Caimi ricuchin Yayitu Dios nishcacunaca ciertotaj pajtarina cashcata.a

¿Diosca llaquicunata tucuchi pudinchu? Ari. Jesús cai Allpapi cashpaca Yayitu Dios llaquicunata tucuchi pudishcatami ricuchirca. Huaquin ejemplocunata ricushun.

Allpa chujchuicuna, acapanacuna. Shuj punllaca Jesusca paipaj apostolcunahuanmi Galilea mama cuchata pasacurcacuna. Chaita ricujpimi huairandij tamya ñapish yacuta caiman chaiman cuyuchijpi, barcoca yacupi pambari callarirca. Chaimi Jesusca yacutaca: ‘¡Casijlla cai, ama chashna ruraichu!’ nijpi tucui casijlla tucurca (Marcos 4:35-39, QC, 1989). Chashnami Jesusca paipish, paipaj Yayapish achca poderta charishcata ricuchirca (Colosenses 1:15, 16, NVI, 1999).

Ungüicuna. Jesusca ñahui mana ricujcunata, cojocunata, sisu ungüihuan cajcunata, ataques ungüihuan cajcunatami alliyachirca. Shina jambidor cajtaca achca gentecunami yacharca. Chaimantami Bibliapica Jesusmi ‘tucui ungushcacunatapish alliyachirca’ nin (Mateo 4:23, 24; 8:16; 11:2-5).

Yaricaicuna. Jesús cai Allpapi cashpaca ishqui cutinmi achca gentecunaman micunata cararca. Chai milagrota rurachunca Yaya Diosmi paimanca poderta curca (Mateo 14:14-21; 15:32-38).

Huañuicuna. Jesús cai Allpapi cashpaca quimsa cutinmi huañushcacunata causachirca. Shujtacarin chuscu punlla huañushcatami causachirca. Shina causachishpami Jehová Dios huañushcacunata causachina poderta charishcata ricuchirca (Marcos 5:35-42; Lucas 7:11-16; Juan 11:3-44).