¿Tucuita ruraj Diosca pai cusha nishcacunataca ima shinataj huillan?

Gentecuna tiyai callarishca punllamantami Diosca angelcunata, profetacunata cachashpa gentecunahuan parlashca. Pai huillashcacunata, imalla rurasha nishcacunatapish quillcachishpami churashca. Diosca shamuj punllacunapica sumaj causaitami cusha nin. Pero, ¿maipitaj chaimantaca yachai tucunchij?

Dios imalla nishcacunataca Diospaj Shimipimi yachai tucunchij (2 Timoteo 3:16). Pai nishcacunata profetacuna quillcachunca ¿Yaya Diosca imatataj rurarca? Diosca profetacunapaj yuyaipimi paipaj yuyaicunata churarca (2 Pedro 1:21). Por ejemplo, shuj jefeca paipaj nishcacunata quillcachunmi secretarioman huillan. Ñucanchijca secretario quillcashcata liyishpaca secretariopaj yuyaicuna cashcataca mana yuyashunchu. Si no jefepaj yuyaicuna cashcatami intindishun. Chai shinallatajmi Diospish paipaj yuyaicunata quillcachunca runacunata agllarca. Pero chai yuyaicunaca Diospaj yuyaicunami can.

DIOSPAJ SHIMITACA TUCUICUNAMI CHARI TUCUNCHIJ

Diospaj Shimipi tiyaj huillaicunaca achca valishcami can. Chaimantami Diosca tucui gentecuna paipaj Shimita liyichun, intindichun munan. Cunan punllacunapica chꞌican chꞌican llajtacunamanta pueblocunamanta, chꞌican chꞌican rimaicunamantami Diosmanta shamuj alli huillaicunataca yachai tucuncuna (Apocalipsis 14:6). Dios bendiciajpimi paipaj Shimitaca completota o huaquin partecunallata 3 mil yalli shimicunapi traducishcacuna. Chaica shujtaj librocunamanta maihuan yallimi can.