¿Jesús huañushcata yuyaringapajca ñachu listo cangui?

Jesusca pai huañunapaj ashalla horascuna faltajpimi paipaj apostolcunahuan Pascua fiestata rurasha nirca. Chai qꞌuipaca paica pai huañushcata yuyarichunmi mandarca. Chaimantami Pedrota, Juantaca Pascuata rurangapaj, maipi tandanacuna ucuta allichichun cacharca (Lu 22:7-13; página 1-pi tiyaj dibujota ricui). Ñucanchijpish 27 de marzo punllapi Jesús huañushcata yuyaringapajmi allichirina canchij. Congregacioncunapica conferenciata cungapaj, maipi tandanacungapaj, tandata vinota charingapajmi huaquin arreglocuna tiyanga. Pero ¿Jesús huañushcata yuyaringapajca ima shinataj cada uno allichirina canchij?

Jesús huañushcataca shungumanta agradici. Chaipajca Diospaj Shimita punllanta yachashunchij nishca folletopi Jesús huañushcata yuyaringapaj liyina versocunata liyi. Tandanacuipi yachana pꞌanga abril de 2020-pi “Jesús huañuna ñaupa Jerusalenpi imalla rurashcacuna” nishca recuadrotapish ricui (La Biblia. Traducción del Nuevo Mundopi, Apéndice B12-A y B12-B-pi “La última semana de Jesús en la tierra” nishca recuadrotapish españolpi ricui). Cambaj familiahuanpish Jesús huañushcamanta agradicingapajca Índice de las publicaciones nishcapi o Guía de estudio nishcapimi ashtahuan yachai tucungui.

Shujtajcunatapish invitai. Jesús huañushcata yuyarinamanca Bibliamanta yachacujcunata, cambaj familiacunata, compañerocunata, rijsishcacunata invitangapaj esforzari. Congregacionta pushaj huauquicunapish congregacionmanta caruyashca huauqui panicunata invitangapajmi esforzarina can. Maijan shujtaj ladopi causacujpica pai causan ladopi ima hora, maipi tandanacunata yachachunmi ayudai tucungui. Chaipajca jw.org paginapi, ÑUCANCHIJTA RIJSI, “Jesús huañushcata yuyarina tandanacui” nishcaman yaicuchun ayudai.

¿Imallatataj ashtahuan rurai tucunchij?