Imata decidicushpapish Jehová Diostami punta lugarpi churashcani

Ñucaca 19 de mayo de 1940 huatapimi Líbano, Amiún llajtapi huacharircani. Asha huatacuna qꞌuipaca ñuca familiahuanmi Libanollapitaj saquirij Trípoli llajtapi causanaman rircanchij. Ñuca familiaca cꞌuyaj, Yayitu Diosta sirvijmi carca. Ñucanchijca 5-purami carcanchij. Quimsa huarmicuna, ishqui cꞌaricunami carcanchij. Ñucaca último huahuami carcani. Ñuca yaya mamapajca cullquita gananaca mana importantechu carca. Ashtahuanpish Bibliata estudiana, tandanacuicunaman rina, gentecunaman Diosmanta yachachinami ashtahuan importante carca.

Ñuca congregacionpica jahua pachaman rina esperanzata charij huauqui panicunami tiyarca. Paicunamanta shujca Michel Aboudmi carca. Paica estudio del ibro nishcatami pushaj carca. Cai huauquica Nueva Yorkpimi Bibliamanta yachashca carca. Qꞌuipaca 1921 huatapimi Líbano llajtapi punta cutin predicación tiyachun ayudanaman shamushca carca. Huauqui Michelca Escuela de Galaadmanta graduarishca Anne y Gwen Beavor shuti panicunataca cꞌuyaihuan, respetohuanmi ayudaj carca. Cai ishqui panicunaca ñuca familiapaj alli amigacunami carca. Achca huatacuna qꞌuipaca pani Annehuan Estados Unidospi tupashpami cushilla sintirircani. Tiempo qꞌuipapish pani Gwenhuanmi tuparcani. Paica Wilfred Gooch shuti huauquihuanmi cazarashca carca. Ishquindijmi Inglaterra, Londres Betelpi sirvicushcacuna carca.

LÍBANO LLAJTAPIMI HUILLARCANCHIJ

Ñuca uchillaraj cajpica Líbano llajtapica ashalla Testigocunami tiyarca. Ashallacuna cashpapish, panda religioncunata pushajcuna jarcaicunata churajpipish gentecunamanmi Bibliamanta yachachijcuna carcanchij. Chai tiempopi ima tucushcataca cunancamami yuyarini.

Shuj punllaca ñuca pani Sanahuanmi shuj edificiopi predicacurcanchij. Chaimi shuj curaca ricurirca. Paitaca pimi cayashcangacuna. Cai curaca achcata pꞌiñarishpa, cꞌamishpami ñuca panitaca escaleramanta tꞌangashpa shitarca. Chaipi causajcunaca ratomi policiata cayashcacuna carca. Ñuca panica escaleramanta urmashpami chugririrca. Chaimi cai policiacunaca cꞌuyaihuan ñuca panita ayudarca. Policiacunaca cai curataca policiapaj oficinamanmi aparcacuna. Chai oficinapica cai curataca pistolahuan cajtami japircacuna. Chaimi policiacunata mandajca: “¿Canca gentecunamanca Diosmantachu yachachingui o huañuchinatachu yachachingui?” nishpa tapurca.

Cutin shuj punllaca congregacionhuanmi shuj buspi caru lugarpi predicanaman rircanchij. Chai lugarpica ñucanchijca alajatami predicacurcanchij. Chaimi shuj curaca ñucanchij predicacujta ricushca carca. Chai curaca achcata pꞌiñarishpa, gentecunata tandachishpami ñucanchijta llaquichichun nirca. Chai gentecunaca rumicunahuan shitashpami ñuca yayatapish chugrichircacuna. Chaimi ñuca papitoca ñuca mamitahuan rato busman tigrarcacuna. Ñucanchijpish sustarishcami paicunata catishpa rircanchij. Ñuca mamita ñuca papitopaj ñahuita pꞌichacushpa “Jehová Dios paicunata perdonapailla, mana yachaimantami chaita rurancuna” nishcatami siempre yuyarini.

Shuj cutinca ñuca huacharishca llajtapimi ñuca abuelitota visitanaman rircanchij. Ñuca abuelitopaj huasipica shuj rijsishca curami cashcarca. Paica ñuca mama yaya testigo de Jehová cashcataca allimi yacharca. Ñuca 6 huatacunallata charijpipish cai curaca: “¿Canca imamantataj manaraj bautizarishcangui?” nishpami tapurca. Chaimi ñucaca: “Bautizaringapajca Bibliataca allimi yachana cani, sinchi fetami charina cani” nishpa cutichircani. Chashna cutichijpica curaca ñuca abuelitomanca: “Cambaj nietoca mana respetanchu” nircami.

Pero Líbano llajtapi causajcunaca mana tucuicunachu ñucanchijta mana alli tratajcuna carca. Ashtahuanpish achcacunami alli apanacujcuna, mana mitsacuna carca. Chaimantami achca gentecunaman Bibliamanta predicarcanchij, yachachircanchij.

SHUJTAJ LLAJTAPI CAUSANAMANMI RIRCANCHIJ

Ñuca escuelapi cajpirajmi Venezuelamanta shuj huauquica Líbano llajtata visitanaman shamurca. Paica ñucanchij congregacionmanmi shamuj carca. Chaimi ñuca pani Wafataca rijsi callarirca. Tiempohuanca ñuca panihuanmi cazararca. Qꞌuipaca ishquindijmi Venezuela llajtapi causanaman rirca. Ñuca pani Wafaca ñuca papitotaca: “Cancunataca achcatami extrañani, Venezuela llajtapi causanaman shamuichij” nishpami quillcaj carca. Qꞌuipaca ñuca papitoca familiandijmi Venezuela llajtapi causanaman rinata decidirca.

1953 huatapimi Venezuela llajtapi saquirij Caracas llajtaman chayarcanchij. Chaipica gobiernopaj mandana huasi cꞌuchullapimi causai callarircanchij. Ñucaca maipica presidente shuj mushuj carropi pasajta ricushpaca cushillami sintirij carcani. Pero ñuca yaya mamapajca chai llajtapi amañarinaca mana jahuallachu carca. Paicunaca mushuj shimita, mushuj culturatami rijsina carca. Shinallataj chai llajtapica micuna, climapish shujtaj layami carca. Pero ña chai llajtapi amañaricushpaca jatun llaquitami charircanchij.

JATUN LLAQUI ATRAZOMI JAPIRCA

Ñuca papitoca ima ungüitaca mana charijchu carca. Pero ñapish mana yuyashcapimi ñuca papitoca ungurca. Chaimi doctorpajman pusharcanchij. Doctorcunaca ñuca papito cáncer ungüita charishcatami huillarcacuna. Chaimi paitaca operarcacuna. Pero operashca shuj semana qꞌuipallami ñuca papitoca huañurca.

Ñuca papito huañui horasca ñucaca 13 huatacunatami charircani. Pai huañunataca mana yuyashcachu carcanchij. Ña mana nunca cushilla causashunchu nishpami yuyarcanchij. Ñuca mamitapish ñuca papito huañushcata mana crij layami carca. Pero qꞌuipaca Jehová Diospaj ayudahuanmi ñaupajman catircanchij. Ñucaca ña 16 huatacunata charishpa colegiomanta graduarishpaca ñuca familiata mantiningapajmi ayudasha nircani.

Chai tiempopica ñuca pani Sanaca Rubén Araujo nishca huauquihuanmi cazararca. Chai huauquica Escuela de Galaadmanmi rishca carca. Qꞌuipaca Venezuelamanmi tigrashca carca. Ñuca panihuan cazarashca qꞌuipaca ishquindijmi Nueva Yorkpi causanaman rinata decidircacuna. Ñuca familia universidadpi ñuca estudiachun decidijpica ñucapish paicunahuanmi Nueva York llajtapi causanaman rircani. Paicunaca Diosta alli sirvichunmi alli ejemplota curcacuna. Nueva York llajtapica Brooklynpi español shimipi tiyaj congregacionpimi tandanacuj carcanchij. Chaipica sinchi feta charij huauqui panicunami tiyarca. Por ejemplo, Brooklyn Betelpi sirvij huauqui Milton Henschel y huauqui Frederick Franzca ñucanchij tandanacuj congregacionpimi sirvijcuna carca. Ñucaca paicunapaj alli amigomi tucurcani.

Universidadpi punta huatata ña tucuchicushpaca La Atalaya revistapi Yayitu Diosta ashtahuan sirvingapaj imallata ruranatami yacharcani. Ñuca congregacionpi sirvij precursorcuna, betelitacuna cushilla cashcatami ricurcani. Pero ñucaca manaraj bautizarishcachu carcani. Chaimi Yayitu Diosman mingarishpa 30 de marzo de 1957 huatapi bautizarircani.

VALISHCA DECISIONCUNATAMI AGLLARCANI

Bautizarishca qꞌuipami precursor tucusha nircani. Pero universidadpi estudiacushcamanta precursor cangapaj mana tiempota charinatami cuentata curcani. Chaimi ñuca familiamanca: “Precursor tucungapaj universidadpi estudianatami saquigrini” nishpa huaquin cartacunata quillcashpa cacharcani. Ña Venezuelaman tigrashpami precursor tucurcani.

Junio de 1957-pimi Caracas llajtaman tigrarcani. Pero ñuca familiata ayudangapaj trabajana cashcatami cuentata curcani. Ñucataca shuj bancopi trabajachunmi cayarcacuna. Pero ñucaca precursor cangapajmi Venezuela llajtaman tigrarcani. Chaimi bancopi trabajanata, precursor canatapish decidircani. Achca huatacunatami chaita rurarcani. Ocupado cashpapish cushillami sintirircani.

Ñuca huarmi tucuna Sylviata rijsishpaca cushillami sintirircani. Paica paipaj yaya mamahuanmi Alemaniamanta Venezuelapi causanaman shamushcacuna carca. Yayitu Diosta Sylvia tucui shunguhuan cꞌuyashcamantami tiempo qꞌuipaca paihuan cazararcani. Qꞌuipacarin ishqui huahuitocunatami charircanchij: Michel y Samira. Shinallataj ñuca mamita ñucanchijhuan causachunmi decidircanchij. Ñuca familiata mantiningapaj precursor canatami saquircani. Chashnapish tucui shunguhuanmi predicashpa catircani. Ashtahuancarin vacaciones punllacunapica Sylviapish, ñucapish precursorado auxiliartami japircanchij.

SHUJ VALISHCA DECISIONTAMI AGLLARCANCHIJ

Callaripi nishca shinaca chai tiempopica ñucanchijca alaja huasita, alli causaitami charircanchij. Pero ñuca vecinocuna Diosta ñuca alli sirvij cashcata rijsichunmi munarcani. Chaimantami ñuca huarmihuanca si menos cullquihuan cusai tucushcata ricungapajca cuentata rurarcanchij. Bancopi trabajanata saquijpica ñucamanca achca cullquitami liquidana carca. Ima deudata mana charishcamanta chai cullquihuan achca tiempota minishtirishca cosascunallahuan causai tucushcatami cuentata curcanchij.

Chai decisionta agllanaca mana jahuallachu carca. Pero ñuca huarmipish, ñuca mamitapishmi chai decisionta agllachun apoyarcacuna. Shinaca cutin precursor cangapajmi listo carcani. Pero mana shuyashca noticiatami chasquircanchij.

ALAJA REGALOTAMI CHASQUIRCANCHIJ

Shuj punllaca doctorca ñuca huarmi Sylviataca huahuatami charigringuichij nircami. Chai noticiata chasquinataca mana shuyarcanchijchu. Pero shuj huahuata charinata yachashpaca cushillami sintirircanchij. Cushilla sintirishpapish “¿ñucaca cutin precursor cai tucushachu?” nishpami tapurircani.

Abril de 1985 huatapimi ñucanchij huahua Gabrielca huacharirca. Y junio de 1985 huatapimi ñuca huarmihuan parlashpa bancopi trabajanata saquircani. Qꞌuipaca precursormi tucurcani. Tiempohuanca ñucataca Comité de Sucursal del país nishcapi sirvichunmi invitarcacuna. Pero sucursal Caracas llajtamanta 80 kilómetros carupi cashcamantami semanapica ishqui o quimsa cutincuna viajana carcani.

CUTIN SHUJTAJ LADOPI CAUSANAMANMI RIRCANCHIJ

Sucursalca La Victoria nishca llajtapimi saquirirca. Chaimi chai llajtapi causanaman rircanchij. Chaipi causanaman rinaca mana jahuallachu carca. Ñuca pani Baha nishcaca ñuca mamitatami cuidashpa saquirirca. Ñuca churi Michelca ñami cazarashca carca. Pero Samira y Gabrielca ñucanchijhuanrajmi causacurca. Paicunaca Caracas llajtapi paicunapaj amigocunatami saquina carca. Cutin ñuca huarmi Sylviaca jatun llajtata saquishpa uchilla llajtapi causangapajmi amañarina carca. Y tucuicunami shuj uchilla huasipi causangapaj amañarina carcanchij. Cai sinchi cambiocunata rurashcamantami ñuca familiataca achcata agradicini.

Qꞌuipaca ashtahuan cambiocunatami charircanchij. Gabrielpishmi cazararca. Cutin Samiraca shujtaj ladopi causanamanmi rirca. Shinallataj 2007 huatapimi ñuca huarmita, ñucatapish Betelpi sirvichun invitarcacuna. Cunancamami Betelpi cushilla sirvicunchij. Ñucanchij churi Michelca ancianomi can. Y paipaj huarmi Monicahuanmi precursores cancuna. Gabrielpishmi anciano can. Paica paipaj huarmi Ambrahuanmi Italia llajtapi Yayitu Diosta sirvicuncuna. Samirapish precursorami can. Paica paipaj huasimantami Betelpaj huaquin trabajocunata rurashpa ayudan.

CAI DECISIONCUNATA AGLLASHCAMANTACA MANA ARREPINTIRINICHU

Ñuca causaipi imata decidishcamantaca mana arrepintirinichu. Alli decisioncunata agllashcamantami Jehová Diostaca ashtahuan sirvi tucushcani. Cai tucui huatacunatami Jehová Dioshuan alli apanacuna tucuimanta yalli valishca cashcata intindishcani. Ima laya decisioncunata agllajpipish Jehová Diosmi alli decidichun ayudai tucun (Filipenses 4:6, 7). Cunanca ñuca huarmihuanmi Betelpi cushilla sirvicunchij. Jehová Diosta punta lugarpi churashcamanta, alli decisioncunata agllashcamantami Diosca ñucanchijtaca achcata bendiciashca.