Caitami tapushcacuna
¿Juranamantaca Bibliapica imatataj yachachin?
Maipica imata pajtachisha nishpami Diospaj ñaupajpi ari ninchij o juranchij. Chaitaca shimicunahuan nishpa o quillcashpami rurai tucunchij.
Jesusca: ‘Ama nunca juranguichij. Cancunaca “ari” nishcataca pajtachichij, “mana” nishcatapish pajtachichij. Cancuna nishcata mana pajtachishpaca Diablo yuyachishcatami ruracunguichij’ nircami (Mateo 5:33-37, NWT). Caita yachashpami huaquincunaca “juranaca mana allichu can” nishpa yuyancuna. Pero Jesusca israelitacuna leyta cazungapajca maipica jurana cashcataca allimi yacharca. Diosta sirvijcunapish huaquinpica jurashcataca allimi yacharca (Génesis 14:22, 23; Éxodo 22:10, 11). Shinallataj Jehová Diospish paita sirvijcunahuanmi maipica shuj juramentota ruraj carca (Hebreos 6:13-17). Caita alli yachashpaca mana nunca jurana cashcataca Jesusca mana nisha nicurcachu. Ashtahuanpish paica yangamanta mana jurana cashcatami nisha nicurca. Chaimanta Diospaj ñaupajpi ari nishpaca chaita pajtachingapaj esforzarishunchij. Jehová Diosca chaita pajtachichunmi munan.
Shinashpaca ¿canta shuj juramentota rurachun mañajpica imatataj rurana cangui? Puntaca, chaita pajtachinata o mana pajtachinatami alli ricunaraj cangui. Mana pajtachi tucushpaca mana shuj juramentota ruranachu cangui. Bibliapica: “Imata rurashami nishca jahua mana pajtachinapaj randica, imata mana shimi llujshinami ashtahuan alli” ninmi (Eclesiastés 5:5). Chai huashaca imata rurachun nishcaca Biblia yachachishcata valichishcata o mana valichishcatami alli ricuna canchij. Chaita ricushpaca cada unomi ari ninata o mana ari ninata decidina canchij. Cunanca caita ima shinalla pajtachinataca Bibliapimi ricushun.
Huaquin juramentocunaca Biblia yachachishcataca mana jarcanchu. Por ejemplo, shuj novio, novia Diospaj ñaupajpi, shujtajcunapaj ñaupajpi “cunanca ishquindij cꞌuyaita ricuchishpa, cuidanacushpami huañuna horascama causashun” nishpami ari nincuna (Huaquin novio, noviaca mana cai laya shimicunata nishpapish Diospaj ñaupajpimi ari nincuna). Chai huashaca paicunaca tucui causaipajmi cusa huarmi tucuncuna (Génesis 2:24; 1 Corintios 7:39). Cazarangapaj ari ninaca Diospajca valishcami can.
Huaquin juramentocunaca Biblia yachachishcacunatami jarcan. Por ejemplo, armacunahuan shuj llajtata difindichun nijpi, o Diosta sirvinata saquichun nijpica chaitaca mana ari ninchijmanchu. Pero chaita rurashpaca Diospaj mandashcacunatami mana cazushcata ricuchishun. Jehová Diosta sirvijcunaca mana cai mundopajchu canchij. Chaimantami politicapi, guerracunapica mana chagrurina canchij (Juan 15:19; Isaías 2:4; Santiago 1:27).
Maipica ima juramentota ruranata o mana ruranataca cada unomi decidina canchij. Chashna decidingapajca Jesús ima nishcapimi yuyarina canchij. Jesusca: “Cesarpajtaca, Cesarman cuichij. Taita Diospajtaca Taita Diosman cuichij” nircami (Lucas 20:25).
Caipi yuyashun. Shuj huauquichari shujtaj llajtapaj ciudadano tucusha nin o shuj pasaporteta llujchisha nin. Chaipajca autoridadcunaca shuj juramentota rurachunchari mañangacuna. Pero chashna jurana Biblia yachachishcacunahuan mana de acuerdo cajpica huauquica mana juranachu can. Chaimi autoridadcunaca cai huauqui ima decidishcata respetangapajca chai juramentota allichin o ashata cambian.
Juramentota chashna cambiajpica cai huauquica chai juramentota ruranata o mana ruranatami decidina can. Romanos 13:1-pica: “Jatun mandajcunataca tucuicuna cazuchun” ninmi. Cai versopi ima nishcata yuyarishpami huauquica chashna jurana mana ima jucha cashcata intindin. Chaimantachari chai juramentota ruranata decidinga.
Caitapish yuyashun. Maipica imatapish japishpa o ima señasta rurashpa jurachunchari mañangacuna. Ñaupa punllacunapica romanocuna, escitacunaca paicunapaj espadata japishpami guerrapi ayudaj shuj yanga diosta mañashpa, shuj juramentota rurajcuna carca. Cutin griegocunaca maquita alzashpami shuj juramentota rurajcuna carca. Paicunaca jahua pachamanta shuj dios uyacushcata o ricucushcata ricuchingapajmi chaita rurajcuna carca.
Cunan punllacunapica Diosta sirvijcunaca shuj banderata muchashpa, mana cashpaca banderapaj ñaupajpi o gentecuna adoran cosascunapaj ñaupajpi cumurishpaca mana juranachu canchij. Pero shuj tribunalpi Biblia jahuapi maquita churashpa tucuita verdadta ningapaj jurachun nijpica, ¿imatataj rurashun? Quizás shuj huauquica chaita ruranatami decidinga. Ñaupa punllacunapipish Diosta sirvijcunaca Diospaj ñaupajpi shuj señasta rurashpami shuj juramentota rurajcuna carca (Génesis 24:2, 3, 9; 47:29-31). Ñucanchijpish shuj tribunalpi chashna jurashpaca Diospaj ñaupajpi juracushcatami yuyarina canchij. Chaimanta imata tapujpica tucuitami verdadta nina canchij.
Cai yachaipi ricushca shinaca manaraj shuj juramentota rurashpami Jehová Diosta mañana canchij. Chaita pajtachi tucushcata o mana pajtachi tucushcatapish allimi ricuna canchij. Chaita pajtachina Bibliahuan de acuerdo cashcata o mana de acuerdo cashcatapishmi ricunaraj canchij. Pero ña shuj juramentota rurashpaca chaita tucuita alli pajtachingapajmi esforzarina canchij. Chashnami Jehová Dioshuan alli apanacushun (1 Pedro 2:12).