Manchaicunataca ladomanmi saquina canchij

1. ¿Huaquinpica imamantataj manchaita charinchij?

CAI CATIJ huauqui panicunapi yuyashun. Nestorca paipaj huarmindijmi huillana minishtirin lugarpi sirvinaman risha nirca.b Chaipajca minishtirishca cosascunallahuan causangapajmi huaquin cambiocunata rurana carca. Pero chai cambiocunata ruranatami mancharcacuna. Biniam shuti huauquipipish yuyashun. Pai causan llajtapica autoridadcunaca testigo de Jehovacunatami llaquichin. Paica testigo de Jehová tucushpaca paitapish llaquichina cashcataca allimi yacharca. Chaimantami manchaita charirca. Pero paipaj familia pai testigo de Jehová cashcamanta pꞌiñarinata yachashpacarin ashtahuanmi manchaita charirca. Valeria shuti panipipish yuyashunchij. Paica cáncer ungüita charishcatami yachaj chayarca. Pani Valeriaca yahuarta mana churashpa operachunmi shuj doctorta mashcarca. Ungushca cashcamantami paica huañunata mancharca.

2. ¿Imamantataj achca manchaitaca mana charina canchij?

² Ñucanchijpish cai huauqui panicuna shinami manchaita charishcanchij. Pero achca manchaita charishpaca mana alli decisioncunata agllashpami Diosmanta caruyashun. Diabloca manchaimanta Diosta mana cazuchun, predicanatapish saquichunmi munan (Apocalipsis 12:17). Pero Diablo millai, poderoso cajpipish manchaitami saqui tucunchij. Caita ima shina pajtachinata ricushun.

3. ¿Manchaita mishangapajca imatataj crina canchij?

³ Diablo manchachisha nijpipish, Jehová Dios ñucanchijta cꞌuyashcata crishpaca imatapish mana manchashunchu (Salmo 118:6). Por ejemplo, Salmo 118-ta quillcaj runaca achca llaquicunatami charirca. Maijan autoridadta charijcunaca paipaj contrami tucurcacuna. Paitapish llaquichishami nircacuna. Shinallataj Jehová Diospish paitaca sinchitami disciplinarca (Salmo 118:9, 10, 13, 18). Chashna llaquicunata charishpapish cai runaca imatapish mana manchashachu nircami. ¿Imamantataj cai runaca manchaita mana charirca? Jehová Dios paita disciplinajpipish paita achcata cꞌuyashcatami yacharca. Shinallataj Dios paita ayudangapaj listo cashcatapishmi yacharca. Caita intindishpami manchaitaca mana charirca (Salmo 118:29).

4. ¿Jehová cꞌuyashcata crishpaca imacunallatataj ña mana manchashun?

⁴ Manchaita mishangapajca Jehová Dios canta achcata cꞌuyashcatami crina cangui. Chaita crishpaca familiata ima shina mantininamantaca mana achcata preocuparinguichu. Shinallataj shujtajcuna llaquichinatapish, huañunatapish mana manchanguichu. Párrafo 1-pi parlashca huauqui panicunaca Jehová Dios paicunata achcata cꞌuyashcatami seguros carcacuna. Chaimantami manchaita mishai tucurcacuna.

FAMILIATA IMA SHINA MANTININAMANTACA MANA ACHCATA PREOCUPARINACHU CANCHIJ

5. ¿Maipica imamantataj familiata ima shina mantininamanta preocuparinchij? (Página 1-pi tiyaj fotomanta parlapai).

⁵ Canca cambaj familiata mantiningapajmi achcata esforzaricungui (1 Timoteo 5:8). Chaimantachari COVID ungüi tiyan horasca trabajomanta, familiata ima shina mantininamanta, arriendotapish ima shina paganamanta achcata preocuparishcangui. “¿Trabajo illaj saquirishpaca imatashi rurashayari?” nishpachari tapurishcangui. Mana cashpaca párrafo 1-pi parlashca Néstor y María shinachari “menos cullquihuan causanaca sinchimi canga” nishpa preocuparishcangui. Diabloca chashna manchaita charishcamanta Diosta sirvinata saquichunmi munan.

6. ¿Diabloca imatataj crichisha nin?

⁶ Diabloca “ñucanchij familiata mantiningapajca Jehová Diosca manataj ayudangachu” nishpa yuyachunmi munan. Chaita crishpaca asha ashami Diosmanta caruyashun. Trabajotapish punta lugarpimi churai callarishun.

7. ¿Jesusca imatataj yachachirca?

⁷ Jesusca Yayitu Jehová ñucanchijta ayudanata, cuidanataca allimi yacharca. Chaimantami paica: “Cancuna manaraj mañajpimi imata minishtishcataca cancunapaj Yayaca ña yachan” nirca (Mateo 6:8). Ñucanchijca Jehová Diospaj familiami canchij. Pai ñucanchij Yaya cashcamantami 1 Timoteo 5:8-pi nishca shinaca tucui ñucanchijta cuidashpa catinga.

8. a) ¿Familiata ima shina mantininamanta ama yallitaj preocuparingapajca imatataj crina canchij? b) ¿Fotopi caj cusa huarmimantaca imatataj yachai pudinchij?

⁸ Jehová Dios ñucanchijta cꞌuyashcamanta ñucanchij familiata mantiningapaj ayudagrishcatami crina canchij (Mateo 6:31-33-ta liyipai). Jehová Diosca cai Allpata rurashpaca mana ashalla cosascunatachu rurarca. Ashtahuanpish tucuicuna cushilla causachunmi tucui laya achca cosascunata rurarca (Génesis 2:9). Chaimantami pꞌichillata charishpapish chaita cushcamanta Jehová Diosta agradicina canchij (Mateo 6:11). Cai tiempopi mana achca cosascunata charijpipish Jehová Diosca ñami achcata bendiciashca. Shamuj punllacunapicarin ashtahuanmi bendicianga. Néstor y Mariaca Jehová Dios paicunata ima shina bendiciashcataca allimi ricurcacuna (Isaías 65:21, 22).

9. ¿Néstor y Mariamantaca imatataj yachai pudinchij?

⁹ Colombiamanta caj Néstor y Mariaca alli huasita, alli trabajocunatami charijcuna carca. Paicunaca: “Ashtahuan predicangapajmi minishtirishca cosascunallahuan causasha nircanchij. Pero menos cullquihuan causanatami manchayanarca” nincunami. ¿Paicunaca manchaitaca ima shinataj misharcacuna? Jehová Dios paicunata ima shina cꞌuyaihuan cuidashcatami yuyarircacuna. Jehová Diospi confiashcamantami paicunapaj trabajocunata saquishpa, paicunapaj huasita cꞌatushpa huillana minishtirin lugarpi sirvinaman rircacuna. ¿Chai decisionta japishcamantaca ima shinataj sintirincuna? Nestorca: “Mateo 6:33-pi nishca shinami cunancamaca mana ima faltashca. Cunanca más contentosmi causanchij” ninmi.

SHUJTAJCUNA LLAQUICHINATACA MANATAJ MANCHANACHU CANCHIJ

10. ¿Gentecunaca imamantataj shujtajcunata manchanchij?

¹⁰ Cai tucui tiempopica gentecunapurami llaquichinacushcacuna (Eclesiastés 8:9). Achca gentecunapish, autoridadta charijcunapish shujtajcunatami llaquichincuna, cꞌamincuna, lituncuna. Escuelapipish, familiapipishmi maipish cachun tratancuna. Cai tucuimantami gentecunaca achca manchaita charincuna. Satanasmi chashna manchaita charichun munan.

11, 12. ¿Diabloca imamantataj shujtajcunata manchachun munan?

¹¹ Satanasca gentecunata manchashpa predicanata saquichun, Diosta cazunata saquichunmi munan. Chaimantami huaquin gobiernocunaca ñucanchijcuna predicachunca mana saquincuna. Huaquin huauqui panicunatapishmi llaquichincuna (Lucas 21:12; Apocalipsis 2:10).Huaquin gentecunacarin testigo de Jehovacunamantami achca llullacunata nincuna. Chaicunata crishpami huaquincunaca ñucanchijta mana uyasha nishpa ñucanchijmanta burlarincuna, llaquichincunapish (Mateo 10:36). Apostolcuna causashca tiempopipishmi Diabloca shinallataj llaquichij carca (Hechos 5:27, 28, 40).

¹² Shujtajcunaca testigo de Jehová cashcata familiaman huillanatami ashtahuan manchancuna. Huaquin huauqui panicunaca paicunapaj familiata cꞌuyashcamantami paicunapish Diosta rijsichun, cꞌuyachun munancuna. Pero familiacuna Diosmanta, testigo de Jehovacunamanta mana alli parlajpica llaquillami sintirincuna. Shinapish tiempohuanca familiacunaca Yayitu Diostami sirvi tucuncuna. Pero ¿ñucanchij familia ñucanchijmanta caruyajpica imatashi rurashun?

13. ¿Familiacuna ñucanchijmanta caruyajpipish Jehová Diosca ima shinataj ñucanchijtaca cuidanga?

¹³ Salmo 27:10-pi ima nishcata yachashpaca cushillami sintirinchij (Salmo 27:10-ta liyipai). Familiacuna ñucanchijmanta caruyajpipish Jehová Dios ñucanchijta cꞌuyashcata, bendicianata crishpaca tranquilosmi sintirishun. Jehová Diosca paita sirvishpa catichun, cushilla, alli cachunmi tucui ñucanchij ima minishtishcacunata cunga. Párrafo 1-pi parlashca huauqui Biniamca Jehová Dios chashna cuidashcatami ricurca.

14. ¿Huauqui Biniammantaca imatataj yachai tucunchij?

¹⁴ Huauqui Biniamca autoridadcuna paita llaquichinata yachashpapish testigo de Jehovami tucurca. Paica: “Autoridadcunaca achcata catirashpami llaquichircacuna. Pero ñuca familia Diosta sirvinata jarcanatami ashtahuan manchayanarca. Ñuca yayapish, ñuca familiapish ñucamanta caruyanatami mancharcani” ninmi. ¿Biniamca manchaita saquingapajca imatataj rurarca? Biniamca Jehová Dios paita cꞌuyashcata, paita sirvijcunatapish siempre cuidashcatami yuyarirca. Paica: ‘Huaquin huauqui panicunata llaquichishpami burlarincuna. Huaquincunacarin ashalla cullquitami charincuna. Pero Jehová Diosca tucui paicunatami ayudashca. “Jehová Diosta sirvinata mana saquijpica paicunata shinami ñucatapish cuidanga” nishpami yuyarcani. Huaquin cutincunami ñucataca carcelpi churashpa achcata maltratarcacuna. Pero chai llaqui horascunapica Jehová Dios ñucata ima shina ayudashcatami ricurcani. Jehová Diosca ñucata achcata cꞌuyaj Yayami can. Huauqui panicunapish ñuca familiami can’ ninmi.

HUAÑUNATACA MANA MANCHANACHU CANCHIJ

15. ¿Imamantataj huañunataca manchanchij?

¹⁵ Huañuica shuj enemigo shinami achcata llaquichin (1 Corintios 15:25, 26). Ñucanchij familia ungushca cajpi o ñucanchijllataj ungushca cashpaca huañunatami manchanchij. Pero ¿imamantataj huañunataca manchanchij? Jehová Diosca ñucanchijtaca huiñaipaj causachunmi rurarca. Chaimantami huañunata manchanchij (Eclesiastés 3:11, NWT). Mana huañusha nishcamantami alli alimentarinchij, ejerciciotapish ruranchij, alli cuidarinchij, doctorpajman rinchij, minishtishpaca jambicunatapishmi ubyanchij.

16. ¿Diabloca Diosta sirvinata saquichunca imatataj ruran?

¹⁶ Diabloca ñucanchij mana huañusha nishcataca allimi yachan. Paica: “Cancunaca mana huañusha nishpami Diosta sirvinata saquinguichij” nishpami juchachin (Job 2:4, 5). Chaimantami Diabloca huañunata manchashpa Diosta sirvinata saquichun munan (Hebreos 2:14, 15). Huaquinpica millai gentecunaca: “Yayitu Diosta mana sirvinata saquijpica huañuchishunmi” nishpami manchachisha nincuna. Mana cashpaca llaqui atraso japijpimi mana Testigo familiacuna o doctorcunaca yahuarta churarichun o Dios mana munashca tratamientota catichun obligasha ningacuna.

17. Romanos 8:37 al 39-pi nishca shinaca ¿imamantataj huañunataca mana manchana canchij?

¹⁷ Ñucanchijca huañunataca mana munanchijchu. Pero huañujpipish Jehová Diosca ñucanchijta yuyarishpa, cꞌuyashpami catinga (Lucas 20:37, 38; Romanos 8:37-39-ta liyipai). Paica huañushcacunata causachinata, huiñai causaita cunatapishmi munan (Job 14:15). Chaimantami paipaj cꞌuyashca Churita ñucanchijmanta huañuchun curca (Juan 3:16). Caita ricushpaca Jehová Dios ñucanchijta achcata cꞌuyashcata, cuidashcatami intindinchij. Chaimantami ungushca cashpapish, maijanpish huañuchisha nijpipish Yayitu Diosta sirvishpa catinchij. Llaquicunata ahuantangapajpish Diostaca fuerzata, yachaita cuchunmi mañanchij. Valeria, paipaj cusapish chaitami rurarcacuna (Salmo 41:3).

18. ¿Pani Valeriamantaca imatataj yachai pudinchij?

¹⁸ Pani Valeriaca 35 huatacunata charishpami cáncer ungüita charishcata yachaj chayarca. Paica huañunata manchashpapish Jehová Diosta cꞌuyashcamantami chai manchaita mishai tucurca. Pani Valeriaca: “Ñucaca cáncer ungüita charinataca mana nunca yuyarcanichu. Cai ungüimanta jambiringapajmi operarina carcani. Pero doctorcunaca yahuarta churashpami operasha nircacuna. Chaimi achca manchaita sintircani. Pero Diosta cazungapajmi sin yahuar operarisha nircani. Jehová Diosca ñucataca siempremi cꞌuyashca. Chaimi ñucapish paiman cꞌuyashcata ricuchisha nircani. Doctorcuna anchayacungui nijpipish Jehová Diosca fuerzata cushpami ayudarca. Jehová Diosta cushichisha nishpami paita tucuipi cazurcani. Qꞌuipamanca sin yahuarmi operarcacuna. Chairijmi ungushpa catini. Pero Jehová Diosca ayudashpami catishca. Por ejemplo, cancerta charishcata manaraj yachashpaca tandanacuipica ‘Afrontemos con valentía los golpes de la vida’c nishca yachaitami yacharcanchij. Chai yachaitaca cutin cutin liyishpaca fuerzastami japircanchij. Chashna tandanacuicunaman rinata, predicanata, estudianata mana saquishcamantami ñucapish, ñuca cusapish tranquilos sintirircanchij. Alli decisioncunatapish japi tucushcanchij” ninmi.

MANCHAITA MISHASHPA CATISHUNCHIJ

19. ¿Jehová Diosca imatataj ñalla ruranga?

¹⁹ Achca huauqui panicunaca Jehová Dios ayudajpimi manchaicunata mishai tucushcacuna (1 Pedro 5:8, 9). Canpish manchaicunatami mishai tucungui. Jehová Dios mandashca shinami Jesuspish, paihuan mandajcunapish ñalla Diablopaj tucui ruraicunata tucuchinga (1 Juan 3:8). Chai huashaca cai Allpapica cushillami causashun. Imatapish ña mana manchashunchu (Isaías 54:14; Miqueas 4:4). Chai punlla chayangacamaca manchaita mishashpa catingapajmi esforzarina canchij.

20. ¿Manchaicunata mishangapajca imatataj rurana canchij?

²⁰ Manchaicunata mishashpa catingapajca Jehová Dios ñucanchijta cꞌuyashcata, cuidashcatami crina canchij. Chaipajca Jehová Dios ñaupa tiempopi paita sirvijcunata ima shina ayudashcata, ñucanchijtapish ima shina ayudacushcatami yuyarina canchij. Tucui chaicunatami shujtajcunamanpish parlana canchij. Jehová Diospaj ayudallahuanmi ñucanchijpish manchaicunata mishai pudishun (Salmo 34:4).