Ñucataca Jehová Diosmi alli ñanta pushashca

BLACK COUNTRY NISHCA LLAJTAMANTACA AFRICAPI SIRVINAMANMI RIRCANI

1935 huatapimi Inglaterra, Black Country llajtapi huacharircani. Black Country nishca shutica yana llajta nisha ninmi. Chai llajtapica achca fabricacuna tiyashcamantami huairapi achca cushni tiyan. Ñuca cuatro huatacunata charijpica ñuca yaya mamaca Testigocunahuanmi Bibliamanta yachai callarircacuna. Ña 15 huatacunata charishpaca ñucaca verdadta yachacushcatami cuentata curcani. Chaimantami 16 huatacunata charishpa 1952 huatapi bautizarircani.

Chai tiempopica carrocunapaj piezacunata ruraj fabricapimi trabajai callarircani. Chai fabricapica shuj importante puestota cungapajmi ñucataca capacitai callarircacuna. Chaimi ñucaca dimastij contentarircani.

Shuj punllaca superintendente de circuitomi ñuca congregacionpi estudio del librota pushachun mingasha nirca. Pero ñucaca chaita chasquinata o mana chasquinataca mana yacharcanichu. Chai tiempopica ñuca trabajoca ñuca huasimanta carupimi carca. Chaimantami chaupi semanapi tandanacuiman ringapajca, ñuca trabajo cꞌuchullapi caj shujtaj congregacionman rij carcani. Cutin fin de semanapica ñuca yaya mamahuanmi ñuca congregacionpi tandanacuiman rij carcani.

Pero ñucaca Diospaj organizaciontami ashtahuan apoyasha nircani. Chaimantami ñuca trabajota saquishpa, chaupi semanapi ñuca congregacionpica estudio del librota pushai callarircani. Ñuca trabajota saquishcamantaca mana arrepintirinichu. Jehová ñucata pushachun saquishcamantami paitaca ashtahuan sirvi tucushcani.

Ñuca trabajo cꞌuchullapi caj congregacionpica Anne shuti panitami rijsircani. Paica sumaj, tucui shunguhuan Diosta sirvijmi carca. Chaimantami 1957-pica cazararcanchij. Ñuca huarmisitahuanca precursores regulares, precursores especialesmi carcanchij. Congregacioncunatapishmi visitarcanchij. Betelpipishmi sirvishcanchij. Cai tucui huatacunataca ñuca huarmisitaca achcatami cushichishca.

1966 huatapica clase número 42 de Galaad nishca escuelamanmi rircanchij. Chaiman rinaca dimastij alajami carca. Graduarishca qꞌuipaca África, Malaui llajtapi sirvichunmi cacharcacuna. Chai llajtapica cꞌuyaj, alli gentecunami can. Shinapish chaipica mana achca tiempotachu saquiri tucurcanchij.

MALAUI LLAJTAPICA LLAQUICUNAMI TIYARCA

1 de febrero de 1967 huatapimi Malaui llajtaman chayarcanchij. Chayashcahuanca chaipi parlaj shimita yachangapajmi, shuj quillata shuj cursota charircanchij. Chai huashaca congregacioncunata visitachunmi ñucanchijta cacharcacuna. Tucui ladocunaman richunpish, yacucunata pasachunpish cuatro por cuatro carrotami curcacuna. Pero chai carroca jatun yacucunataca mana pasai tucurcachu. Huaquinpica ugsha huasicunapimi saquirij carcanchij. Chaimantami tamia ama pasachunca techopi sacocunata churana carcanchij. Chashna jarcaicunata charishpapish misionero shinami cushilla Yayitu Diosta sirvishpa catircanchij.

Abril quillapica Malauipica achca llaquicunami tiyai callarirca. Hastings Banda nishca presidenteca: “Testigo de Jehovacunaca impuestocunataca mana paganchu, gobiernotapish mana cazuncunachu” nishpami radiopica juchachirca. Tucui chaicunaca mana ciertochu carca. Ñucanchijcuna mana politicapi chagrurishcamanta, tarjetas de afiliación nishcacunata mana randishcamantami paicunaca pꞌiñajcuna carca.

Septiembre quillapica presidenteca: “Testigo de Jehovacunaca ñucanchij contrami tucushcacuna” nishpami periodicopica llujchirca. Chaimantami shuj tandanacuipica presidenteca “Testigocuna predicachun, tandanacuchunca ña mana saquishunchu” nishpa huillarca. 20 de octubre de 1967-mi caica tucurca. Chai qꞌuipami policiacunaca sucursalta huichcangapaj, shinallataj misionerocunata Malaui llajtamanta llujchingapaj rircacuna.

Quimsa punlla carcelpi pasashca qꞌuipaca Mauricio llajtamanmi cacharcacuna. Pero chaipica misionero shina sirvichunca mana saquircacunachu. Chaimantami Rodesia, Zimbabue llajtaman cacharcacuna. Chaiman chayajpica shuj policiaca: “Malaui llajtamanta, Mauricio llajtamantami llujchishpa cacharcacuna. Cancunaca mana ni maiman ri pudishcallamantami caipi canguichij” nirca. Ñuca huarmica achcatami huacai callarirca. Ñucanchijtaca ni pi mana cꞌuyashcatami sintircanchij. Chaimantami Inglaterra llajtaman cutin vueltasha nircani. Pero autoridadcunaca sucursalpi saquirichunmi saquircacuna. Cayandij punllaca cutinmi cuartelman rina carcanchij. Pero tucuitami Jehovapaj maquipi saquircanchij. Cayandij punllaca Zimbabue llajtapi saquirichunmi saquircacuna. Jehová ñucanchijta ayudacushcatami sintircani.

ZIMBABUE LLAJTAMANTAMI MALAUI LLAJTATA AYUDACURCANCHIJ

Zimbabue sucursalpica Departamento de Serviciopimi trabajachun churarcacuna. Malaui y Mozambique llajtapi causaj huauqui panicunataca alli predicachunmi ayudana carcani. Pero Malaui llajtapi causaj huauqui panicunataca achcatami llaquichicurcacuna. Chai llajtapi sirvij superintendentecunaca ima tucushcata huillangapajmi cartacunata cachajcuna carca. Ñucaca chai cartacunatami traducij carcani. Shuj tutapica cartacunata liyishpa, traducishpaca huauqui panicuna achcata sufricushcata yachashpami huacarcani.a Pero paicuna ahuantashpa catishcata liyishpaca contentomi sintirircani (2 Corintios 6:4, 5).

Malaui llajtapi llaquichicushcamantami huaquin huauqui panicunaca Mozambique llajtaman rircacuna. Ñucanchijcunaca Malaui y Mozambiquepi caj huauqui panicuna espiritualmente alli cachunmi ayudashpa catircanchij. Shinallataj chichewa shimiman traducij huauqui panicunaca Zimbabue llajtamanmi rircacuna. Malaui llajtapica chichewa shimitaca achcacunami parlancuna. Traducishpa catichunmi shuj huauquica paicunamanca oficinacunata, huasicunata rurashpa curca.

Malaui llajtapi sirvij superintendente huauquicuna cada huata Zimbabue llajtaman richunmi saquirircanchij. Chaipica quimsa punlla jatun tandanacuitami chichewa shimipi uyai pudircacuna. Conferenciacunapaj bosquejocunatapishmi chasquircacuna. Paicuna cutin Malaui llajtaman tigrashpaca, quimsa punlla jatun tandanacuipi ima uyashcatami shujtaj huauqui panicunaman yachachi pudircacuna. Malaui llajtapi sirvij superintendentecuna animota chasquichunmi, shuj huataca Zimbabue llajtapica Escuela del Ministerio del Reinota rurai tucurcanchij.

Malaui llajtamanta llujshishcacunata chasquingapajca Mozambique llajtapimi uchilla huasicuna tiyarca. Febrero de 1975 huatapimi chaicunapi causaj huauqui panicunata visitanaman rircani. Chai huauqui panicunaca Diospaj organización cushca instruccioncunatami catircacuna. Chaipica pushaj ancianocunami tiyarca. Mushuj ancianocunaca tandanacuicunapi discursocunata cuchun, Huillaj revistamanta yachangapaj, cada punllapaj agllashca versota yachangapajpishmi organizados carcacuna. Jatun tandanacuicunatapishmi rurajcuna carca. Shinallataj pꞌichangapaj, huauqui panicunaman micunacunata cungapaj, tucuicunata cuidangapajmi alli organizados carcacuna. Jehová Diospaj ayudahuanmi chai tucuita rurai pudircacuna. Chaita ricushpaca achca animotami japircani.

1980 huata manaraj tucujpica Zambia sucursalmi, Malaui llajtapi predicachun organizashpa catina carca. Chaipi causaj huauqui panicunatapish cuidashpami catina carca. Pero Zimbabue sucursalpi sirvij huauquicunaca Malauimanta caj huauqui panicunatami ayudasha nircanchij. Chaimantami Zimbabuemanta Comité de Sucursalpi sirvij huauquicunapish, Central Mundialmanta pushaj huauquicunapish, Malauimanta, Sudafricamanta, Zambiamanta pushaj huauquicunapish tandanacushpami Malauipi causaj huauqui panicunata ima shina ayudanata ricurashpa catircanchij.

Tiempohuanca Malaui ladocunapi tiyaj llajtacunapica Testigocuna predicachun, Diosta libremente sirvichunmi saqui callarircacuna. Malaui llajtapipish Testigocunata ña mana tanto llaquichircacunachu. Chaimi huaquin huauqui panicunaca Malaui llajtaman tigranata decidircacuna. 1991 huatamantami Mozambique llajtapipish Testigocuna libremente predicachun saquircacuna. Pero Malaui llajtapica huauqui panicunaca manaraj libremente predicai tucurcacunachu.

MALAUI LLAJTAMANMI TIGRARCANCHIJ

1993 huatapica Malaui llajtapica Testigocuna libremente predicachunmi saquircacuna. Chai huashaca shuj misioneroca ñucataca: “¿Malaui llajtaman tigragringuichu?” nishpami tapurca. Chaimi ñucaca: “Ña mana ri pudinichu. Ñami 59 huatacunata charini” nircani. Pero chai punllallapitajmi Cuerpo Gobernantepi sirvij huauquicunaca Malaui llajtaman tigrachun invitarca.

Zimbabue sucursalpi sirvinatami achcata munarcanchij. Chaipimi amañarircanchij, alli amigocunatapishmi charircanchij. Chaimantami tucui chaicunata saquinaca sinchi carca. Pero Cuerpo Gobernante huauquicunaca “Zimbabue sucursalpimi saquiri tucunguichij” nircacunami. Zimbabue sucursalpi saquirinaca jahuallami canman carca. Chaimantami Abrahampaj y Sarapaj ejemplopi yuyarcanchij. Paicunaca mayorllacuna cashpapish Jehová Dios nishcacunata cazungapajmi paicunapaj huasita saquircacuna (Génesis 12:1-5).

Ñucanchijpish Jehová Diosta cazusha nishcamantami 1 de febrero 1995-pica Malaui llajtaman tigrarcanchij. 28 huatacuna qꞌuipami chaiman cutin tigrarcanchij. Chaipica ñucapish, ishqui huauquicunapish Comité de Sucursalpimi sirvi callarircanchij. Congregacioncunapi caj huauqui panicunatapish predicachun, tandanacuchunmi ayudai callarircanchij.

TESTIGO DE JEHOVACUNA MIRARICHUNMI JEHOVÁ DIOSCA AYUDARCA

1993-pica Malaui llajtapica 30.000 Testigocunami carcanchij. Pero Diospaj ayudahuanmi 1998 huatapica 42.000 yalli Testigocuna tucurcanchij.b Ashtahuan huauqui panicuna tiyashcamantami Cuerpo Gobernante huauquicunaca shuj mushuj sucursalta shayachichun nircacuna. Chaimi Lilongüe llajtapica shuj jatun allpata randircanchij. Ñucamanpish, shujtaj huauquicunamanpishmi chai construccionta organizachun mingarcacuna.

Mayo de 2001 huatapica, Cuerpo Gobernantemanta huauqui Guy Pierceca chai mushuj sucursalta utilizai callaringapajmi shuj discursota curca. Chai tandanacuipica 2.000 yalli Testigocunami carcacuna. Achcacunacarin 40 yalli huatacunatami bautizarishca carca. Paicunaca sinchi llaquicunatami ahuantashcacuna carca. Ashalla cosascunata charishpapish chai huauqui panicunaca espiritualmente sinchimi carcacuna. Chai mushuj Betelta visitacushpaca dimastij contentomi carcacuna. Chaimantami tucui ladocunapi Yayitu Diosta cantashpa alabarcacuna. Chaita ricushpaca ñucapish dimastij cushillami sintirircani. Chai huauqui panicuna llaquicunata ahuantashcamantami Jehová Diosca achcata bendiciarca.

Sucursalta shayachishca huashaca mushuj Tandanacuna Huasicunapi conferenciata cuchunmi ñucata cacharcacuna. Callaripica Malaui llajtapi huauqui panicunaca uchilla huasicunapimi tandanacujcuna carca. Techocunataca esteracunahuanmi rurajcuna carca. Bancacunataca barrohuanmi rurajcuna carca. Pero qꞌuipaca alaja Tandanacuna Huasicunata rurachunmi sucursalca organizarca. Chaita shayachingapajca huauqui panicunallatajmi ladrillocunata rurajcuna carca. Sillacunata ruranapaj randica bancacunatami rurajcuna carca. Bancacunapimi ashtahuan yaicuncuna nijcunami carca.

Jehová Dios huauqui panicunata sinchi feta charichun ima shina ayudashcata ricushpaca cushillami sintirircani. Huaquin jovencitocunaca ayudana munaitami charircacuna. Paicunaca congregacionpipish, Betelpipish imata yachachishcataca ratomi yachajcuna carca. Chaimi paicunaca ashtahuan ayudai tucurcacuna. Mushuj superintendente de circuito huauquicunaca Malaui llajtamanta cashcamantami congregacioncunata achcata animarcacuna. Achca superintendentecunaca cazadocunami carcacuna. Familiacuna, vecinocuna huahuacunatami charina canguichij nijpipish, paicunaca Diosta ashtahuan sirvingapajmi huahuacunata mana charinata decidircacuna.

ALLI DECISIONCUNATA AGLLASHCAMANTAMI CONTENTO SINTIRINI

África llajtacunapica 52 huatacunatami sirvircanchij. Pero qꞌuipaca ñapishmi ungurircani. Chaimi Cuerpo Gobernantemanta huauquicunapish, Comité de Sucursalpi sirvij huauquicunapish Gran Bretaña sucursalman richun cacharcacuna. Africata saquinaca sinchimi carca. Pero Gran Bretaña Betelpi sirvij huauqui panicunami ñucanchijtaca alli cuidacun.

Jehová Dios ñucata pushachun saquina, paipi confianaca allimi cashca. Pero ñucallapitaj o trabajollapi confiashca cashpaca llaquipimi urmaiman carcani. Jovenraj cashpaca jatun empresapi trabajanatami munarcani. Pero Diospaj organizacionpi Yayitu Diosta sirvinami chai empresatapish yalli alli cashca (Proverbios 3:5, 6). Chaimantami dimastij cushilla sintirini.