¿Huaquincunaca imatataj crin?

Hinduismo

Hinduismo religionta catijcunaca, cunan causaipi o ñaupa causaipi ñucanchij rurashcacunamantami sufrinchij, pero moksha nishcata pajtashpa o espiritupi ña cacharichishca cashpaca, ña mana ashtahuan sufrishunchu nincunami. Shinapish, chaita pajtangapajca tucui cai causaipaj preocupaciontami ñucanchij yuyaimanta anchuchina canchij nincunami.

Islam

Islam religionta catijcunaca, juchacunata rurashcamanta, feta charishcata ricuchingapajmi sufrinchij nincunami. Sociedad Islámica de América del Norte organizacionta ñaupa pushaj Sayyid Syeed shuti runaca, “ñucanchij sufrimientoca tucui bendicioncunata chasquishcamanta Diosta agradicina cashcata, imata minishticujcunata ayudana cashcatami yuyachin” ninmi.

Judaísmo

Judaísmo religionta catijcunaca, ñucanchij culpallamantatajmi sufrinchij nincunami. Huaquin judiocunaca maijan yangamanta llaquita apajcunataca cutin causarijpimi justiciata rurangacuna nincunami. Cutin judaísmo místico nishcata catijcunaca reencarnación o shujtaj cuerpopi cutin causai callarishcatami crincuna. Chashnami shuj personaca allita rurangapaj tauca oportunidadta charishcamanta juchacunamanta librari tucuncuna nincunami.

Budismo

Budismo religionta catijcunaca, ñucanchij munaicunamanta, ruraicunamanta, mana alli sentimientocunamanta libraringacamami cutin cutin huacharishpa sufrinchij nincunami. Chashnami alli yuyaicunata charishpa, alli cosascunata rurashpa, mana alli yuyaicunata jarcarishpa ña nirvana nishcata pajtanchij o llaquicunamanta librarinchij nincunami.

Confucionismo

Diccionario de religiones comparadas nishca shinaca, confucionismo religionta catijcunaca runacunapaj pandarishcacunallamantatajmi sufrinchij, pero alli causashpaca mana tanto sufrishunchu nincunami. Shinallataj gentecunata yalli poderta charij espiritucuna ñucanchijta llaquichishcamantami ashtahuanca sufrinchij nincunami. Chashnataj destinashca cashcamantami sufrishpa causana canchij nincunami.

Religiones tribales

Huaquin religiones tribales nishcata catijcunaca brujiashcamantami sufrinchij nincunami. Huaquin gentecunaca, brujocunaca alli suertetami apamun o dañotami rurai tucun nincunami. Chai gentecuna ungushpaca chai brujiashcata anchuchichunmi curanderopajman rishpa limpiata rurancuna.

Cristianismo

Jesusta catinchij nijcunaca Génesis libropi nishca shinaca Adán Evapaj juchamantami sufrinchij nincunami. Paicunapuramanta huaquincunaca paicunapaj propio yuyaicunahuanmi yachachincuna. Por ejemplo, huaquin catolicocunaca iglesiata Yaya Dios bendiciachun o pita quishpichichunmi llaquicunata apana canchij nincunami.