Ashtahuan amigocunata chari
¿Huaquincunaca imamantataj mana allita juzgancuna?
Yangata shina ricushca gentecunamanta caruyashpaca paicunataca ashtahuanmi pꞌiñai callarishun. Cutin ñucanchij laya amigocunallahuan apanacushpaca tucuita alli yuyacushcata, alli ruracushcatami crishun.
Bibliamanta consejo
“Cancunapish shunguta pascaichigari” (2 CORINTIOS 6:13, NVI, 1999).
¿Imatataj nisha nin? Cai versopi shungu nishpaca ñucanchij sentimientocunamantami parlacun. Ñucanchij laya amigocunallahuan apanacushpaca shujtajcunaman cꞌuyaita ricuchinatami ñucanchijllataj jarcashun. Ama chashna tucuchunca tucui laya gentecunahuan apanacunatami mashcana canchij.
¿Tucui laya amigocunata charinaca ima shinataj ayudan?
Shujtajcunata alli rijsishpaca paicuna imamanta caita chaita ruraj cashcatami alli intindishun. Shujtaj gentecunahuan apanacushpaca, paicunapish ñucanchij parte cashcatami sintishun. Paicunata ashtahuan valorashpami paicuna cushilla o llaquilla cajpipish ñucanchijpish paicuna shinallataj sintirishun.
Nazaré shuti huarmipaj experienciata yachashun. Paica shujtaj llajtamanta cajcunata mana allita shina ricunatami saquirca. Nazareca: “Paicunahuanmi tiempota pasaj carcani, trabajaj carcani. Chai gentecunata rijsishpaca paicunamanta nishcacunaca mana cierto cashcatami yachaj chayarcani. Shujtaj culturamanta caj gentecunahuan amigarishpaca paicunata cꞌuyashpa, valorashpami mana allita juzganata saquishun” ninmi.
¿Imatataj rurai tucungui?
Shujtaj shimita parlaj, shujtaj llajtacunamanta, shujtaj razamanta caj gentecunata rijsingapaj esforzari. Shinallataj caicunata rurai:
Paicunamanta parlachun mañai.
Micunaman invitai.
Paicunapaj causaimanta parlashcata uyai. Paicunapaj ima ashtahuan importante cashcata tapui.
Paicuna imalla pasashcata yachaj chayashpaca, paicunatami alli intindingui. Chai grupo gentecunamanta mana allita yuyanatapishmi saquingui.