¿Ima verdad cashcataca ima shinataj yachai tucunchij?
“Jahua pachapish, cai pachapish ñapishmi ricurircalla” (Stephen Hawking y Leonard Mlodinow, físicos, 2010).
“Jahua pachata, cai pachata callarichijca Taita Diosmi” (Biblia, Génesis 1:1).
¿Jahua pachatapish, cai Allpatapish Dioschu rurarca? ¿O yangamantallachu ricurirca? Stephen y Leonard nishcacunahuan Biblia nishcacunahuanca mana igualchu can. Maijancunaca shuj yuyaita, cutin caishujcunaca caishuj yuyaitami shungumanta apoyancuna. Achcacunaca paicunapaj crishcataca televisionpi o librocunapimi difindincuna. Chaimi huaquincunaca imata crinataca mana yachancuna.
Tal vez quiquinpaj profesorcunaca jahua pachapish, cai Allpapish yangamantalla tiyai callarishcatami yachachishcangacuna. Pi rurajpish mana tiyanchu nishpapishmi yachachishcangacuna. Pero ¿yachachijcunaca caicuna cierto cashcataca ricuchircacunachu? Shinallataj huaquin religionta pushajcunapish Tucuita Ruraj Diosca tiyanmi nishca yachachishcatachari uyashcangui. Pero ¿paicunaca cai cierto cashcata ricuchircacunachu? ¿O crina cashcallamantachu crina canguichij nircacuna?
Canpish cai yuyaicunapichari yuyacushcangui. Shinallataj Tucuita Ruraj Dios de verdadtaj tiyashcataca mana pi yachachi tucunchu nishpachari yuyacushcangui. Chashnallataj canca, ¿caicunamanta yachanaca importantechu can? nishpachari tapurishcangui.
Cai revistapimi achca gentecuna imamanta Tucuita Ruraj Diospi crishcata ricuchin. Shinallataj causai ima shina tiyai callarishcamanta yachanapish imamanta importante cashcatami ricungui.