¿Cai tapuicunapi yuyashcanguichu?

GENTECUNACA achca alli tapuicunatami charin. Canca cai laya tapuicunapi yuyashcanguichu:

• ¿Diosca ñucanchijmanta preocuparinchu?

• ¿Macanacuicunapish, llaquicunapish ima horashi tucuringa?

• ¿Huañushpaca imashi tucunchij?

• ¿Ñucanchij huañushca familiacunata cutin ricushunchu?

• ¿Dios ñucanchijta uyachunca ima shinataj mañana canchij?

• ¿Cushilla causangapajca imatataj rurana canchij?

¿Cai tapuicunata yachangapajca imatataj ruranguiman? Chꞌican chꞌican gentecunata tapujpica, chꞌican chꞌican yuyaicunatami ninga. Alli yachajcunata tapujpipish mana igual cutichingacunachu. Paicunapaj yuyaicuna alli cashpapish asha punllacuna qꞌuipaca ña mana valinchu.

Shinapish, cai tapuicunata alli yachangapajca shuj alli libromi tiyan. Yaya Diosta mañashpaca Jesusca: “Cambaj shimica mana llullajchu” nircami (Juan 17:17). Cambaj shimi nishpaca Bibliamantami parlacurca. Cai hojapica jahuapi ricurij tapuicunamanta Biblia imata yachachishcatami ricushun.

¿Diosca ñucanchijmanta preocuparinchu?

¿IMAMANTATAJ CASHNA TAPURINCHIJ? Muyundij Allpapica achca llaquicuna, mana alli ruraicunami tiyan. Tauca religioncunapica Diospaj munaimantami llaquicunata charinchij nishpami yachachin.

¿BIBLIACA IMATATAJ YACHACHIN? Job 34:​10-pica ninmi: ‘Mana allita ruranaca Diosmantaca carupimi. Millaita ruranapish, Tucuita Rurai Tucuj Diosmantaca carupimi’ can nishpa. Yaya Diosca tucuicuna alli causachunmi munan. Chaimantami Jesusca cashna mañanguichij nirca: ‘Jahua pachapi caj ñucanchij Yaya. Ima shinami jahua pachapi can munashcata ruracun, shinallataj cai pachapipish can munashcata rurachun’ nishpa (Mateo 6:​9, 10). Yaya Diosca paipaj munaita pajtachingapajmi, paipaj shujlla Churita ñucanchijmanta huañuchun cai Allpaman cacharca (Juan 3:16).

Cai versocunatapish mashcangui: Génesis 1:​26-28; 1 Pedro 5:​6, 7.

¿Macanacuicunapish, llaquicunapish ima horashi tucuringa?

¿IMAMANTATAJ CASHNA TAPURINCHIJ? Macanacuicunapica achca gentecunami huañun. Shinallataj tucuicunami chꞌican chꞌican llaquicunata charinchij.

¿BIBLIACA IMATATAJ YACHACHIN? Yaya Diosca cai Allpapi sumaj causai tiyachunmi munan. Cai Allpata Dios mandacujpica ‘macanacuita yachachinapish ña mana tiyangachu’. ‘Paicunapaj espadacunatapish yapuna rejacunatami rurangacuna’ (Isaías 2:⁠4). Shinallataj Yaya Diosca tucui llaquicunatami tucuchinga. Bibliapica ‘Diosca paicunapaj ñahuicunamantaca tucui huiquitami p^ꞌichanga. Ñaupa tucui imalla tiyajcuna ña mana tiyashcamantaca huañuipish, huacaipish, llaquipish, nanaipish ña mana ashtahuan tiyangachu’ nishpami huillacun (Apocalipsis [Revelación] 21:​3, 4).

Cai versocunatapish mashcangui: Salmo 37:​10, 11; 46:​9; Miqueas 4:​1-4.

¿Huañushpaca imashi tucunchij?

¿IMAMANTATAJ CASHNA TAPURINCHIJ? Achca religioncunapica huañushca qꞌuipaca causashpami catinchij nishpami yachachin. Huaquincunaca ninmi, huañushpaca allicunaca jahua pachamanmi rin, cutin mana allicunaca ucu pachamanmi rin nishpa. Shujtajcunaca ninmi, huañushcacunaca ñucanchijta ayudanaman o llaquichinamanmi shamun nishpa.

¿BIBLIACA IMATATAJ YACHACHIN? Huañushpaca ña mana causashpa catinchijchu. Huañushcacunaca mana imata sintinchu, mana uyai tucunchu, mana ricunchu. Eclesiastés 9:​5-pica : “Huañushcacunaca ña imata mana yachanchu” ninmi. Chaimanta huañushcacunaca mana llaquichi tucunchu, mana ayudai tucunchu (Salmo 146:​3, 4).

Cai versocunatapish mashcangui: Génesis 3:19; Eclesiastés 9:​6, 10.

¿Ñucanchij huañushca familiacunata cutin ricushunchu?

¿IMAMANTATAJ CASHNA TAPURINCHIJ? Tucuicunami ñucanchij cꞌuyashca familiacunahuan cushilla causanata munanchij. Chaimantami ñucanchij huañushca familiacunata cutin ricusha ninchij.

¿BIBLIACA IMATATAJ YACHACHIN? Huañushcacunaca causaringami. Hechos 24:​15-pica: ‘Tucui huañushcacunatami Diosca causachinga’ ninmi. Gentecunata Dios rurashpaca cai Allpapi causachunmi churarca. Paicunaca sumaj paraíso Allpapimi huiñaita causana carca. Huañushcacuna causarishpaca cai Allpa shuj paraíso tucujpimi chaipi causangacuna (Isaías 65:​21-25). Diosta alli servijcunaca chai punllacunapimi huiñaita, nanai illaj causangacuna. Proverbios 2:​21-pica: “Allita rurajcunallami cai llajtapica causangacuna. Ima pandata mana rurajcunallami cai allpamantaca mana chingaringacuna” ninmi.

Cai versocunatapish mashcangui: Job 14:​14, 15; Lucas 7:​11-17.

¿Dios ñucanchijta uyachunca ima shinataj mañana canchij?

¿IMAMANTATAJ CASHNA TAPURINCHIJ? Tucui religioncunapimi gentecunaca Diosta mañan. Shinapish huaquincunaca ninmi, Diosca ñuca mañashcataca mana uyanchu nishpa.

¿BIBLIACA IMATATAJ YACHACHIN? Diosta mañanamanta parlashpaca Jesusca nircami: “Cancuna mañacushpaca, ama chaillatataj cutin cutin rimarishpa mañaichijchu” nishpa (Mateo 6:⁠7). ¿Dios ñucanchijta uyachunca ima shinataj mañana canchij? Puntapica Dios imata rurachun munashcatami yachana canchij. Chai qꞌuipaca, can munashcata rurangapaj ayudahuai nishpami Diosta mañana canchij. 1 Juan 5:⁠14-pica: ‘Pai munashca shina rurangapaj imatapish mañajpica, paica uyashpa cungallami’ ninmi.

Cai versocunatapish mashcangui: Salmo 65:2; Juan 14:​6; 1 Juan 3:⁠22.

¿Cushilla causangapajca imatataj rurana canchij?

¿IMAMANTATAJ CASHNA TAPURINCHIJ? Rijsishca cana, alli ñahui cana, cullquita charinami cushi causaita cun nishpami gentecunaca chaicunata mashcashpa causan. Chaicunata charishpapish mana cushilla causancunachu.

¿BIBLIACA IMATATAJ YACHACHIN? Cushilla causangapaj ima minishtirishcata ricuchishpami Jesusca nirca: ‘Diospaj Shimita uyashpa cazujcunami ashtahuan cushicun’ nishpa (Lucas 11:28). Ñucanchijca Diosmanta, paipaj munaimanta Bibliapi ashtahuan yachashpallami cushilla causashun. Diosmanta, paipaj munaimanta yachashpaca ima ashtahuan alli cashcata, ima mana alli cashcatami entendishun. Ñucanchij causaipipish, imata agllacushpapish Biblia ayudachun saquishpaca cushillami causashun (Mateo 5:⁠3).

Cai versocunatapish mashcangui: Proverbios 3:​5, 6, 13-18; 1 Timoteo 6:​9, 10.

Caicamaca sujta tapuicunamanta Biblia imata yachachishcatami ricushcanchij. ¿Ashtahuan yachasha ninguichu? Diospaj Shimipi mandashcata cazusha nishpaca, ashtahuanmi yachashpa catina cangui. Shujtaj tapuicunapish tiyanmi: ¿Imamantataj Diosca llaquicuna tiyachun saquishca? ¿Familiahuan cushilla causangapajca imatataj rurana canchij? Cai tapuicunamanta, shujtaj tapuicunamantapish Bibliaca allimi yachachin.

Shinapish, achca gentecunaca Bibliamanta yachanataca mana munanchu. Sinchimi can, mana entendinichu nincunami. ¿Biblia imata yachachishcata entendingapaj ayudachun munanguimanchu? Bibliamanta yachachingapajca testigo de Jehovacunaca ishqui ayudacunatami charin.

Punta ayudaca ¿Bibliaca imatataj yachachin? nishca libromi can. Cai libroca Biblia yachachishcacunata jahualla entendichunmi ayudan. Caishuj ayudaca Bibliamanta gratis yachachinami can. Shuj testigo de Jehovami cambaj huasipi o can maipi munashcapi, cada semana ashalla tiempopi Bibliamanta yachachinga. Achca gentecunami chashna yachacuncuna. Paicunaca mana llulla yuyaicunata Bibliapi yachashcamantami cushilla sintirincuna.

Canpish Biblia yachachishcacuna achca valishca cashcatami entendi tucungui. Bibliapaj mana llulla yachachishcacunaca cunan punllacunapipish, shamuj punllacunapipish cushilla causachunmi ayudan. Shinallataj ama manchangapaj, religioncunapaj panda yuyaicunamanta, llullacunamantapish llujshingapajmi ayudan. Jesusca nircami: “Chai mana llullami huatashca shinamanta cacharichinga” nishpa (Juan 8:32).