Diosca ¿imamantataj shuj llajtata agllacun?

1. Diosca ¿imamantataj ñaupa israelitacunata paipaj llajta cachun agllarca?

Diosca Abrahampaj huahua huahuacunahuanmi shuj llajtata rurarca. Chai llajtamanmi achca mandashcacunata curca. Chai llajtaca Israel shutimi carca. Paicunami Diosta adorana, Diospaj shimitapish cazuna carca (Salmo 147:​19, 20). Israel llajtamantami tucui llajtacuna achca bendicioncunata chasquina carca. Génesis 22:​18-ta rezapai.

Diosca paimanta huillajcuna o testigocuna cachunmi israelitacunata agllarca. Chai llajtapaj causaimanta yachashpaca, Diospaj mandashcacunata cazuna alli cashcatami yachanchij (Deuteronomio 4:6). Israelitacunamantami shujtaj gentecunapish Diosta rijsi tucurcacuna. Isaías 43:​10, 12-ta rezapai.

2. Diosca ¿imamantataj tandanacushpa paita servichun munan?

Israelitacuna mana cazujpimi Diosca paicunata saquishpa shuj mushuj llajtata agllarca (Mateo 21:43; 23:​37, 38). Cunan punllacunapica Jesusta alli catijcunami Jehová Diospaj testigocuna can. Ña mana israelitacunachu can. Hechos 15:​14, 17-ta rezapai.

Tucui muyundij Allpapi huillachun, yachachichunmi Jesusca paita catijcunata mandarca (Mateo 10:​7, 11; 24:14; 28:​19, 20). Cai tucuri punllacunapica Diosmanta huillana, yachachinaca achcatami miracun. Paita alli adorachunmi Jehová Diosca tucui llajtacunamanta, achca huaranga huaranga gentecunata tandachicun (Apocalipsis 7:​9, 10). Jesusta alli catijcunaca tandanacushca cashcamantami caishujmanta chaishujmanta ayudanacushpa cushicun. Tandanacuicunapipish tucuicunami Bibliamanta chai yuyaicunallatataj yachacuncuna. Hebreos 10:​24, 25-ta rezapai.

3. Cunan punlla testigo de Jehovacunaca ¿ima shinataj callarirca?

Paicunaca 1870 huatacunapimi callarirca. Ashalla gentecuna tandanacushpami Biblia yachachishcacunata alli entendi callarircacuna. Jesusca paita catijcunataca huillanami canguichij nishpami mandashca carca. Chaita entendishpami chai ashalla gentecunaca achca llajtacunapi alli huillaicunata huillai callarirca. 1931 huatapimi testigos de Jehová shutita japircacuna. Hechos 1:8; 2:​1, 4, 11; 5:​42-ta rezapai.

4. Testigo de Jehovacunaca ¿ima shinataj huillanata ñaupajman pushan?

Jesús huañushca qꞌuipa chꞌican chꞌican llajtacunapi tandanacujcunaca, tucuicunata ñaupajman pushaj cꞌaricunata o cuerpo gobernanteta charishcamantami achcata cushicurcacuna. Chai pushajcunaca tucuicunata Jesús uma shina ñaupajman pushacushcatami entendircacuna (Hechos 16:​4, 5). Cunan punllacunapipish achca huatacunata Jehovata servij cꞌaricuna o cuerpo gobernantemi tucui testigo de Jehovacunata ñaupajman pushan. Paicunami tucui muyundij Allpapi sucursalcunata ricushpa ayudan. Sucursalcunapimi Bibliamanta yachana publicacioncunataca, 600 yalli shimicunaman tigrachishpa, rurashpa congregaciocunaman chayachin. Chai cꞌaricunaca Bibliapaj yuyaicunata japishpami 100.000 yalli congregacioncunata cushichishpa ñaupajman pushan. Congregacioncunapipish Diosta servijcunata cꞌuyaihuan ayudaj pushaj cꞌaricunami tiyan. 1 Pedro 5:​2, 3-ta rezapai.

Testigo de Jehovacunaca Bibliapaj alli huillaicunata huillangapaj, yachachingapajmi tandanacushca can. Apostolcuna shinami huasin huasin huillan (Hechos 20:20). Diosmanta yachasha nijcunataca, Bibliamanta yachachishpami ayudan. Mana shuj religionllachu can. Shuj familiapi huauquicuna panicuna shinami, caishujmanta chaishujmanta tucui shunguhuan cꞌuyanacushpa Diospaj ayudatapish chasquincuna. (2 Tesalonicenses 1:3). Diosta servijcunaca Diostami cushichin, shujtajcunatapish ayudanatami munan. Chaimantami tucui Allpamanta ashtahuan yalli cushilla familia can. Salmo 33:12; Hechos 20:​35-ta rezapai.