¿Imamantataj Bibliata yachana cani?

¿IMATATAJ RURANGUIMAN?

Caipi yuyai: Davidca amsa tutapimi mana rijsishca pueblopi puricun. Amsa cashcamantami ñancunata mana alli ricui tucushpa chingarin. Yallitaj amsa cashcamantami shujtaj ladota rishca.

Can David cashpaca, ¿imatataj ruranguiman?

YUYAI

¿Cai quimsa yuyaicunamantaca maijantataj agllanguiman?

1. ¿Maipi cashcata yachangapaj pita tapunguimanchu?

2. ¿Shuj linternata japichishpachu ñanta mashcanguiman?

3. ¿Ñami chayasha nishpa purishpa catinguimanchu?

Ñami chayasha nishpa purishpa catishpaca llaquicunatami charingui.

Tapuna alli cajpipish, linternata japichishpa maita rinata mashcanami alli canga.

Bibliaca suj linterna shinami cantaca alli ñanta richun ayudanga.

Biblia shina shujtaj libroca mana tiyanchu chaimantami:

• Llaquicunata charijpica imata ruranata yachachin.

• Canllataj alli rijsirishpa imatapish alli rurachunmi yachachin.

• Alli causangapaj imata ruranatami yachachin.

¿CASHNA TAPURISCANGUICHU?

Ña rimai callarishpaca chꞌican chꞌican tapuicunatami ruranchij:

• ¿Imamantataj cieloca azul can?

• ¿Mashna lucerocunataj tiyan?

Ña ashtahuan huiñashpaca cai tapuicunatami ruranchij:

• ¿Imamantataj llaquicunata charinchij?

• ¿Imamantataj huañunchij?

¿Cai tapuicunata yachangapajca Bibliaca ayudanchu?

Achca gentecunami Bibliaca ñaupa parlocunallatami charin, ñaupa librollami can, Bibliata entendinaca sinchimi can nincuna. ¿Chaica ciertochu can? ¿Bibliamanta chaicunata nishpaca manachu pandaricuncuna?

Huaquin gentecunaca Diosmi cai pachata mandacun nishpami Bibliaca yachachin nincunami. ¿Dioschu cai pachataca mandacun? Cai pachaca llaquinaimi can. Muyundij allpapimi llaquicuna tiyan. Ungüicuna, huañuicuna, pobreza, allpa chujchuicunami tiyan. ¿Cꞌuyaj Yaya Diosca chashna causachunchu munan?

¿Cai pachata pi mandacushcata yachanata munanguimanchu? Biblia imata yachachishcata ricushpaca mancharishcami saquiringui.

Ima shinami yachacushcangui, cai folletopi tiyaj yuyaicunaca Bibliamantami can. Testigo de Jehovacunaca: “Diospaj shimica, paillataj Quillcachishca cashcamantami yachachingapaj, ima shina cashcatataj rimangapaj, cunangapaj” alli cashcata crinchij (2 Timoteo 3:16, 17). Ñaupa libro cashpapish cunan punllacunapi ima shina causanatami yachachin. Cai librota yachanataca amataj saquinguichu.