YACHAI 8
Abrahanpish, Sarapish Diostami cazurcacuna
Babel llajta cꞌuchullapimi Ur shuti llajta tiyarca. Chaipi causajcunaca Jehová Diosta adoranapaj randica achca yanga dioscunatami adorajcuna carca. Ur llajtapica Diosta sirvij Abrahanmi causarca.
Diosca Abrahantaca: “Cambaj llajtamanta llujshishpa, cambaj familiatapish saquishpa ri. Ñucami can maiman rina llajtata ricuchisha” nircami. Shinallataj Diosca: ‘Cantaca shuj jatun llajtatami rurasha. Canmantami tucui gentecunapish bendiciashca canga’ nircami.
Abrahanca Dios maiman cachasha nishcata mana yachashpapish paipimi crirca. Paipish, paipaj huarmi Sarapish, paipaj yaya Tarepish, paipaj sobrino Lotpish Diostami cazurcacuna. Paicunaca caru llajtaman ringapajmi imalla apanata allichircacuna.
Jehová nishca llajtaman paipaj familiandij chayashpaca Abrahanca 75 huatacunatami charirca. Chai llajtaca Canaán shutimi carca. Chaipimi Diosca Abrahantaca: “Cai allpataca cambaj huahua huahuacunamanmi cusha” nirca. Pero Abrahanpish, Sarapish yuyajcuna cashcamantami huahuacunata mana chari tucurcacuna. Shinapish ¿ima shinataj Diosca pai nishcata pajtachigrirca?
“Feta charishcamantami Abrahanca Dios cayajpica cazurca. Chaimantami paipaj llajtamanta llujshishpa Dios cusha nishca llajtaman rirca. Maiman rinata mana yachashpapish llujshishpa rircallami” (Hebreos 11:8).