Diosmi paicunamanca shuj huahuata curca

Abrahanpish, Sarapish achca huatacunatami cazarashcacuna carca. Ur llajtapi charishca alli huasita saquishpami carpa huasipi causanaman rircacuna. Pero Saraca Jehová Diospi confiashcamantami cushilla causarca.

Saraca shuj huahuata charinatami munarca. Chaimantami Abrahantaca: “Ñucata sirvij huarmihuan chayaripai. Ñucapish paimanta huahuacunata charishapishchari” nirca. Agar ña huahuata charijpica Ismaeltami shutichircacuna.

Abrahanca 99, Saraca 89 huatacunata charijpimi paicunata visitanaman quimsa runacuna chayarca. Paicunataca yura ucupi samarichun, micuchunmi Abrahanca invitarca. Chai runacunaca angelcunami carca. Angelcunami Abrahantaca: ‘Shamuj huataca shuj cꞌari huahuatami charinguichij’ nirca. Chashna nijtami carpa huasi ucumanta Saraca uyacurca. Chaimi shungu ucupi asishpa: ‘¿Ciertotajchu ñucaca mayorlla cashpapish shuj huahuata charisha?’ nirirca.

Shuj huata huashaca Diospaj ángel nishca shinami Saraca shuj huahuata charirca. Abrahanca chai huahuataca Isaac shutitami churarca. Isaacca “asina” nisha ninmi.

Isaac ña 5 huatacunata charijpimi Ismaelca paimanta burlarij carca. Saraca chaita ricushpami Isaacta cuidasha nishpa Abrahantaca: ‘Agartapish, Ismaeltapish caimanta llujshichishpa cachai’ nirca. Abrahanca chaitaca mana rurasha nircachu. Jehovapish Isaacta cuidanatami munarca. Chaimantami Abrahantaca: ‘Sara ima nishcata uyailla. Ñucami Ismaeltaca cuidasha. Cambaj huahua huahuacunaman cusha nishcaca Isaacmantami shamunga’ nirca.