Jehová Diostami cazusha nircacuna

Israelitacuna Egiptomanta llujshishca ishqui quilla qꞌuipaca Sinaí urcumanmi chayarcacuna. Chaipimi carpa huasicunata shayachircacuna. Chaimi Diosca Moisestaca urcuman huichiyamui nirca. Jehová Diosca: ‘Israelitacunataca ñucami quishpichircani. Paicuna ñuca imalla nishcata cazushpaca ñuca pueblomi cangacuna’ nircami. Moisesca urcumanta uriyamushpaca Jehová imalla nishcatami israelitacunaman huillarca. Chaimi paicunaca: “Dios tucui imalla nishcatami pajtachishun” nircacuna.

Moisesca cutinmi urcuman huichiyarca. Chaipimi Diosca: ‘Quimsa punlla qꞌuipa ñuca pueblohuanmi parlagrini. Paicunataca: “Sinaí urcuman ama huichiyanguichij” nigri’ nirca. Moisesca urcumanta uriyamushpaca israelitacunataca Jehová ima nishcata uyangapaj allichirichij nircami.

Quimsa punlla qꞌuipami israelitacunaca Sinaí urcu jahuapi rayocuna ricurijta, yana pꞌuyu cajta ricurcacuna. Shinallataj sinchita cꞌulun nishcata, gachupi tocashcatami uyarcacuna. Qꞌuipaca Jehová Diosca urcu jahuamanmi nina chaupipi uriyamurca. Chaita ricushpami israelitacunaca achcata mancharircacuna. Sinaí urcuca cushnihuanmi tapashca carca, sinchitapishmi chujchucurca. Gachupi tocashcapish ashtahuan ashtahuan sinchitami uyarirca. Chaimi Diosca: ‘Ñucaca Jehová Diosmi cani. Shujtaj dioscunataca ama adoranguichijchu’ nirca.

Moisés cutin urcuman huichiyajpimi Diosca leycunata curca. Chai leycunapica paita ima shina adoranata, ima shina causanatami mandarca. Moisesca chaita quillcashca qꞌuipami israelitacunaman liyirca. Paicunaca: “Jehová Dios nishca shimicunataca tucuitami cazushun” nishpami ari nircacuna. ¿Chaitaca pajtachircacunachu?