Ari nishcatami mana pajtachircacuna

Jehová Diosca Moisestaca: ‘Ñuca maipi cashca urcuman huichiyai. Chaipimi leycunata escribigrishca tabla rumicunata cusha’ nircami. Moisesca urcuman huichiyashpaca 40 punllacunata, 40 tutacunatami chaipi saquirirca. Chaipi cajpimi Diosca ishqui tabla rumicunapi diez mandamientocunata escribishpa Moisesman curca.

Asha tiempo qꞌuipaca israelitacunaca Moisés paicunata shitashpa rishcatami yuyai callarircacuna. Chaimantami Aarontaca: “Ñucanchijta ñaupashpa richun shuj diosta rurai” nircacuna. Chaipimi Aaronca: ‘Cancuna charishca orota apamuichij’ nirca. Orota apamujpimi Aaronca orota yacuyachishpa shuj bizita rurarca. Israelitacunaca: ‘Cai diosmi Egiptomanta llujshichirca’ nircacunami. Shuj fiestata rurashpami chai bizita adorai callarircacuna. Paicunaca Jehová Diosllatami adorashun nishcataca mana pajtachicurcacunachu.

Diosca imalla tucucujta ricushpami Moisestaca: ‘Ñucata mana cazushpamari shuj oro bizita adoracuncuna. Paicunapajman uriyashpa rilla’ nirca. Moisesca ishqui tabla rumicunata apashpami urcumanta uriyarca.

Moisés tigramucushpaca gentecuna cantacujta, bizita adorangapaj bailacujtami ricurca. Chaimi achcata pꞌiñarishpa ishqui tabla rumicunata pambaman shitajpi pꞌaquirircacuna. Chai ratomi bizitapish rupachirca. Qꞌuipaca Aarontaca: “¿Imamantataj cai gentecunataca jatun juchapi urmachircanguiyari?” nircami. Aaronca: ‘Ama pꞌiñarichu. Cai pueblo ima shina cajtaca canllatajmi alli yachangui. Shuj diosta rurachun nijpimi orota ninapi shitajpi cai bizi llujshircalla’ nircami. Aaronca chaitaca mana ruranachu carca. Moisesca cutinmi Sinaí urcuman rirca. Chaipimi israelitacunata perdonachun Jehová Diosta mañarca.

Jehová Diosca paita cazusha nij israelitacunatami perdonarca. Jehová Diostapish, Moisestapish cazunaca valishcami carca.