Jehová Diosca Josuetami agllarca

Moisesca achca huatacunatami Israel llajtataca pushashca carca. Cunanca ñallami huañugrirca. Diosca Moisestaca: ‘Israelitacunataca ñuca cusha nishca Allpamanca canca mana pushanguichu. Pero can chai Allpata ricuchunmi saquisha’ nircami. Chaimi Moisesca israelitacunata cuidachun shuj pushajta agllachun Diosta mañarca. Cutin Diosca: ‘“Josuehuan parlanacui. Paitami agllashcani” ni’ nircami.

Moisesca israelitacunataca: ‘Ñucaca ñallami huañusha. Diosca Josuetami pai cusha nishca Allpaman pushachun agllashca’ nircami. Josuetapish: ‘Diosca canhuanmi canga. Ama manchaichu’ nircami. Asha tiempo qꞌuipaca Moisesca Nebo urcumanmi huichiyarca. Chai urcumantami Jehová Diosca Abrahanman, Isaacman Jacobman cusha nishca Allpata ricuchirca. Moisesca 120 huatacunata charishpami huañurca.

Jehová Diosca Josuetaca: ‘Jordán yacuta pasashpa Canaán llajtaman yaicui. Moiseshuan cashca shinallatajmi canhuanpish casha. Ama manchaichu. Ñuca mandashcataca cada punlla liyinataca amataj saquinguichu. Ñuca tucui mandashcacunata pajtachingui’ nircami.

Josueca Jericó llajtata pacalla ricunamanmi ishqui runacunata cacharca. Catij yachaipimi chaipi ima tucushcata yachashun. Chai ishqui runacuna Jericomanta tigrashpaca: ‘Canaanmanca ña yaicunallamari canchij’ nircacunami. Cayandij punllaca Josueca israelitacunataca carpa huasicunata pascaichij ringapaj nircami. Puntapica Dioshuan ari ninacushca arcata sacerdotecuna apashpa Jordán yacuman richunmi mandarca. Jordán yacuca jundami carca. Shinapish sacerdotecuna yacuman yaicujpimi janaj ladomanta shamuj yacucunaca jarcarirca. Chaimi sacerdotecunaca yacu chaquirishca pambata rishpa chaupipi saquirircacuna. Chashnami tucui israelitacunaca caishuj ladoman pasarcacuna. Chai milagrota ricushpaca Puca cuchapi ima tucushcatami yuyarishcangacuna.

Achca huatacunapimi israelitacunaca Dios cusha nishca Allpaman chayarcacuna. Chaipica huasicunata, pueblocunatapishmi shayachina carca. Chashnallataj uvacunata, granocunata tarpushpami causana carca. Chai allpapica lechepish, mielpishmi tiyarca.