Anaca shuj huahuata cuchunmi Diosta mañarca

Elcaná israelita runaca ishqui huarmicunatami charirca. Shujca Ana, caishujca Peniná shutimi carca. Pero Anataca yallimi cꞌuyarca. Peninaca achca huahuacunatami charirca. Cutin Anaca mana charircachu. Chaimi Anamanta burlarij carca. Cada huatami Elcanaca paipaj familiandij Diospaj carpa huasipi Jehovata adorangapaj Siló llajtaman rijcuna carca. Shuj cutinca chaipi cashpami Elcanaca Ana llaquilla cajta ricurca. Chaimantami: ‘Ana ama huacaichu. Canca ñucatami charingui. Cantaca achcatami cꞌuyani’ nirca.

Qꞌuipaca Ana Diosta mañanaman rishpaca: ‘Shuj huahuata cuhuai. Paitaca paipaj tucui causaipimi canta sirvichun cusha’ nishpami huacashpa mañarca.

Sacerdotecunata mandaj Elica Ana huacashpa shimita cuyuchicujtami ricurca. Chaimantami machashcachu cangui nirca. Chaimi Anaca: ‘Ñuca amitolla, mana machashcachu cani. Achca llaquilla cashpami Diosta mañacuni’ nirca. Elica pai pandarishcata cuentata cushpami Anataca: ‘Can imata mañashcataca Yaya Dios cuchun’ nirca. Anaca ña alli sintirishpami chaimanta rirca. Manaraj huatayajpimi paica shuj churita charirca. Paipaj churitaca Samuel shutitami churarca. Chaimanta Anaca cushilla sintirishcanga.

Anaca Diosman cusha nishcataca mana cungarircachu. Samuelta chuchumanta raquishca qꞌuipallami Diospaj carpa huasipi sirvichun pusharca. Anaca Elitaca: ‘Cai huahuata cuchunmi Jehová Diosta mañacurcani. Paica tucui causaipimi Diospaj canga’ nircami. Elcanapish, Anapish cada huatami shuj mushuj jahua churanata apashpa Samuelta visitanaman rijcuna carca. Tiempohuanca Anaca Diospaj ayudahuanmi quimsa churicunata, ishqui ushushicunata charirca.