Jehová Diosca Samuelhuanmi parlarca

Sacerdotecunata mandaj Elipaj churicunaca Hofní y Finehás shuticunami carca. Paicunaca sacerdote shinami Diospaj carpa huasipi trabajajcuna carca. Pero Diospaj leycunata mana cazushpami israelitacunataca achcata llaquichijcuna carca. Diosman sacrificiocunata cungapaj israelitacuna apamujpica Elipaj churicunaca ashtahuan alli aichatami japijcuna carca. Paicuna mana allita ruracujta yachashpapish Elica mana imata rurarcachu. Chaimanta ¿Jehová Diosca imatataj rurarca?

Samuelca Hofnipaj, Finehaspaj achca huatacuna qꞌuipa cashpapish paicuna shina millaitaca mana rurarcachu. Chaimantami Diosca paihuanca cushilla carca. Shuj tutaca Samuel dormicujpimi paita cayashcata uyarca. Chaimi jatarishcahuan Elipajman rirca. Chayashpaca: ‘Caipimi cani’ nircami. Chashna nijpimi Elica: “Ñucaca mana cayarcanichu. Cutin dormigrilla” nirca. Chaimi Samuelca cutinllataj dorminaman rirca. Cutinllatajmi paitaca cayarca. Quimsa cutinhuan Samuelta cayajta uyashpami Elica Dios cayacushcata cuentata curca. Chaimi Samueltaca: ‘Canta cutin cayajpica: “Jehová Dios, canta sirvijca uyacunimi, huillailla” ningui’ nirca.

Samuel dorminaman tigrajpica cutinmi: ‘¡Samuel Samuel!’ nijta uyarca. Paica: “Huillailla, canta sirvijca uyacunimi” nircami. Chaimi Yaya Diosca: ‘Elitapish, paipaj familiatapishmi llaquichigrini. Elica paipaj churicuna millaita ruracujta yachashpapish paicunata mana correginchu’ nirca. Cayandij tutamantaca cada punlla shinami Samuelca Diospaj carpa huasi punguta pascarca. Shinapish Dios ima nishcata Eliman huillanatami mancharca. Pero Elí Samuelta cayashpaca: ‘¡Samuel, ñuca churilla! ¿Diosca imatataj nirca?’ nishpami tapurca. Chaimi Samuelca tucuita huillarca.

Samuelca huiñashpami catirca. Diosca paipaj amigomi carca. Tucui ladocunapimi israelitacunaca profeta, juez cachun Jehová Dios Samuelta agllashcata yacharcacuna.