Jehoiadá runaca mana mancharcachu

Jezabelca Atalía shuti ushushitami charirca. Paica paipaj mama shinami millai carca. Judamanta reyhuanmi Ataliaca cazararca. Paipaj cusa huañujpica paipaj churimi rey tucurca. Cutin churi huañujpica Ataliami mandai callarirca. Paipaj randi pi ama mandachunmi paipaj nietocunata huañuchirca. Chaimantami tucuicuna paita manchajcuna carca.

Sacerdotecunata mandaj Jehoiadapish, paipaj huarmipish Atalía millaita ruracushcatami yacharcacuna. Chaimantami huañunata mana manchashpa Ataliapaj nietota pacashpa Diospaj huasipi huiñachircacuna. Cai huahuaca Jehoás shutimi carca.

Jehoás siete huatacunata charijpimi Jehoiadaca soldadocunata mandajcunatapish, levitacunatapish tandachirca. Chaipimi: ‘Diospaj huasimanca ama pi yaicuchun saquinguichij’ nirca. Qꞌuipaca Judapaj rey tucuchunmi Jehoiadaca Jehoaspaj umapi coronata churarca. Chaimi gentecunaca: “¡Viva rey!” nishpa caparircacuna.

Diospaj huasipi caparicushcata uyashpami Ataliaca chaiman callpashpa rirca. Mushuj reyta ricushpaca: “¡Contramari jatarishca! ¡Contramari jatarishca!” nishpami caparirca. Chaimi soldadocunata mandajcunaca chai millai reinata llujshichishpami huañuchircacuna. Paica israelitacunapaj mana alli ejemplochu carca. ¿Qꞌuipaca imataj tucurca?

Jehoiadaca Judapi causajcunataca Jehová Diosllata sirvichunmi ari nichirca. Qꞌuipaca Baalpaj huasita, rurashcalla dioscunatapish urmachishpami ñutuchirca. Gentecuna Diosta cutin adorachunmi sacerdotecunata, levitacunata Diospaj huasipi trabajachun churarca. Diospaj huasiman mapata ruraj runa ama yaicuchunpishmi soldadocunata churarca. Qꞌuipaca Jehoiadapish, soldadocunata mandajcunapish Jehoastaca palacioman pushashpami reyta rurarcacuna. Atalía ña mana mandacushcamanta, Baalta adoranapish tucurishcamantami israelitacunaca Diosta alli sirvi tucurcacuna. Chaimantami achcata cushicurcacuna. Jehoiadaca mana manchashpami achca gentecunata ayudarca.